Qazaqstan Parlamenti Senaty jańa Konstitýtsiianyń qabyldanýyna bailanysty raqymshylyq týraly zańdy eki oqylymda maquldady. Sonymen qatar, raqymshylyqty iske asyrýǵa qajetti qylmystyq, qylmystyq-protsestik, ákimshilik quqyq buzýshylyq jáne atqarý óndirisi salalaryndaǵy zańnamalyq túzetýler de qabyldandy, dep habarlaidy ult.kz.
Zań jobasy tek raqymshylyq tetigin engizýmen shektelmei, quqyqtyq júieni jetildirýge, izgilendirýge jáne tsifrlandyrýǵa baǵyttalǵan keshendi ózgeristerdi qamtidy. Degenmen ázirleýshiler bul bastama qylmystyq saiasattyń jumsarýyn bildirmeitinin, asa aýyr qylmystar boiynsha jaýapkershilik saqtalatynyn atap ótti.
Qujatqa sáikes, qylmystyq teris qylyqtar, aýyr emes qylmystar jáne keibir ótelgen nemese ziian keltirilmegen ortasha aýyrlyqtaǵy ister boiynsha tulǵalar jaýapkershilikten nemese negizgi jazadan bosatylýy múmkin. Sondai-aq keibir sottalǵandardyń ótelmegen jazasy qysqartylýy qarastyrylǵan.
Alaida raqymshylyq sybailas jemqorlyq, terrorizm, ekstremizm, kámeletke tolmaǵandarǵa qarsy jynystyq qylmystar, adam óltirý, azaptaý jáne memlekettik satqyndyq siiaqty asa aýyr qylmystarǵa qoldanylmaidy.
Jańa zańnamadaǵy mańyzdy jańashyldyqtardyń biri – ákimshilik raqymshylyq. Ol alǵash ret engizilip otyr jáne azamattar men kásipkerlerdiń oryndalmaǵan ákimshilik aiyppuldarynyń tolyq nemese bir bóligin joiýdy kózdeidi. Raqymshylyq qoldanylǵannan keiin tiisti atqarý óndiristeri toqtatylady.
Sonymen qatar, raqymshylyq rásimderin tsifrlandyrý tetikteri engizilip, sheshimderdiń avtomatty túrde qabyldanýy men elektrondy formatta júrgizilýi qarastyrylǵan. Bul biýrokratiialyq protsesterdi qysqartyp, quqyq qoldaný tiimdiligin arttyrýǵa baǵyttalǵan.
Qylmystyq-protsestik zańnamaǵa da birqatar ózgerister engizilip, aiyptaý aktilerin rásimdeý men tergeý nátijelerin bekitý tártibi naqtylandy. Bul ózgerister sot protsesiniń birizdiligin kúsheitip, quqyqtyq kepildikterdi nyǵaitýǵa baǵyttalǵan.
Raqymshylyq jańa Konstitýtsiianyń qabyldanýyna bailanysty 2026 jylǵy 17 naýryzda jariialanǵan keshendi quqyqtyq reformalar aiasynda júzege asyrylyp jatyr.
