Túrkiia Eýropa odaǵyna barǵysy keletin bosqyndarǵa kedergi jasamaitynyn málimdegen soń Siriia men ózge de elderden shyqqan 13 myńnan astam bosqyn Túrkiia men Grekiia shekarasyna jinaldy. Bul aqparatty 1 naýryzda Birikken ulttar uiymy jariialady.
Grekiia biligi ótken táýlikterde tiisti qujaty joq 10 myńǵa jýyq migrantty toqtatqanyn rastady. Túrkiiadan Grekiianyń Egei teńizindegi araldaryna 500-ge jýyq bosqyn kelgen.
Túrik biligi óz aýmaǵynynan Eýropa odaǵyna qarai sońǵy birneshe kúnde 75 myń migrant ketkenin aitady. Buǵan deiin Grekiia shekarasynda migranttarmen politsiia qaqtyǵysqany jaily habar taraǵan. Politsiia kózden jas aǵyzatyn gaz qoldanyp, Grekiiaǵa kirgisi keletin bosqyndar tas laqtyrǵan.
Túrkiiada qazirgi ýaqytta 3,5 millionnan astam bosqyn bar. Onyń basym kópshiligi 9 jyldan beri azamat soǵysy men keibir elderdiń interventsiiasy júrip jatqan Siriiadan qashyp shyqqandar. Reseidiń qoldaýymen Siriia prezidenti Basar Ashad áskeri Túrkiia áskerine shabýyl jasaǵan soń Túrkiia bosqyndar máselesine bailanysty saiasatyn ózgertetinin jariialaǵan.
Erdoǵan «Túrkiia bosqyndarǵa Eýrodaqpen shekarany ashatynyn, óitkeni Eýrodaq qarjylai kómektesetini jaily ýádesin oryndamaǵanyn jáne Siriia konfliktisin retteýge belsendi qatyspai otyrǵanyn» málimdegen.
