Áleýmettik jelilerde «Túrkiiadan jetken 125 tynys alý apparaty elorda áýejaiynyń qoimasynda jatyr» degen taqyryppen videomaterial taraǵan bolatyn. Osyǵan qatysty mán-jaidy Qarjy ministrliginiń Memlekettik kirister komiteti túsindirip berdi, dep habarlaidy "Ult aqparat".
«Osy jyldyń 14 shildesinde saǵat 02-30-da Nur-Sultan qalasynyń áýejaiyna Túrkiiadan gýmanitarlyq júk keldi. Júkti alýshylar - «SK-Farmatsiia» JShS, «Aidyń nury» qaiyrymdylyq qory men «Otandastar» qory sanalady. 12 tonnadan astam júk dári-dármek, meditsinalyq qorǵanys quraldaryn jáne ókpeni jasandy jeldetý apparattaryn qamtidy. Ushaqtan júkti túsirý 14 shilde kúni saǵat 4:00-de aiaqtaldy. Keiin atalǵan júk áýejai qoimasyna ornalastyryldy. Saǵat 10:00-de taýar alýshylardyń ókilderi kelgennen keiin jeńildetilgen tártipte kedendik rásimdeý júrgizildi. Barlyq kedendik rásimder 10 minýttyń ishinde jasaldy. Tańǵy saǵat 11:00 shamasynda júk áýejaidan birneshe toptamamen áketildi» delingen komitet taratqan aqparatta.
Bul rette Memlekettik kirister komiteti sertifikattaýǵa jatatyn taýarlardy ákelý barysynda kedendik resimdeý úshin ruqsat qujattaryn usyný qajettigin atap kórsetedi.
«Sebebi bizdiń azamattardyń ómiri men densaýlyǵy meditsinalyq preparattar men buiymdardyń sapasyna tikelei táýeldi, al bul - eń mańyzdy talap. Sapasyz preparattar men buiymdardy qoldaný pandemiia kezinde qosymsha qaýip-qater týǵyzady. Memlekettik kirister organdary taýarlardy jedel kedendik resimdeýge kúsh jumyldyrady jáne qajetti qujat usynylǵan kezde gýmanitarlyq kómek dereý shyǵarylady. Osyǵan bailanysty barlyq keden beketteri táýlik boiy jumys jasaidy. Olar qajetti qujattardy usyný jóninde keńes beredi. Kásipkerlik sýbektilerin jáne qoǵamdyq birlestikterdi qandai da bir túsinbeýshilikterdi, tolqýlardy boldyrmaý maqsatynda qajetti keńes alý úshin aldyn ala júginýdi suraimyz. Sondai-aq, 1414, 8-800-080-7777 bailanys telefony arqyly Memlekettik kirister komitetiniń kontakt-ortalyǵyna júginýge bolady» dedi vedomstvodan.
