12-21 qazan aralyǵynda Túrkiianyń Antalia qalasynda qol kúresi sporty boiynsha ótken álem chempionatynda shymkenttik Nasyr Mahambetov chempion atandy. Ol 90 keli salmaq dárejesinde el namysyn abyroimen qorǵap, sol qolmen básekege túsýden qarsylas shaq keltirmedi. Taǵy bir sportshy qyzymyz Sabira Tursynbai 50 keli salmaq dárejesinde sol qolmen kúmis medal, oń qolmen qola medal ielendi.
Nasyr men Sabira Shymkent qalasyndaǵy bilikti basshy Muzrafsha-Jahanger Ablaev basqaratyn múgedekterge arnalǵan №19 sport mektebinde bapker Maqsat Júsipovtiń qaramaǵynda jattyǵady. 33 jasar sportshy Nasyr Mahambetov 11 jyldan beri osy mekteptiń paralimpiadalyq bóliminde paýerlifting sportymen shuǵyldanady. Búginde Qazaqstan ulttyq paralimpiadalyq quramasynyń múshesi. Halyqaralyq dárejedegi sport sheberi atanyp úlgergen. Jetken jetistikteri de az emes.
2007 jyly paýerliftingten álem chempionatynyń kúmis júldegeri atansa, araǵa 4 jyl salyp armrestlingten álemdik dodanyń qola júldesin ielengen. Al, 2016 jyly qol kúresinen Tashkentte ótken Aziia chempionatynda top jardy. Araǵa bir jyl salyp dál osy jetistigin Qyrǵyzstanda ótken «sary qurlyq» birinshiliginde qaitalady.
18 jasar Sabira Tursynbai úshin álem chempionatynyń júldegeri ataný – úlken jetistik. Sabira 16 jasynda-aq Aziia chempiony atanyp úlgergen. 2017 jyly Aziiadan qarsylas tappai, óz ataǵyn qorǵap qalǵan.
Muzrafsha-Jahanger Ablaev basqaratyn Shymkent qalasyndaǵy múgedekterge arnalǵan №19 sport mektebinen budan da ózge bairaqty básekelerde top jarǵan sportshylar kóptep shyqqan. Bul mektep – elimizdiń abyroiyn halyqaralyq arenada qorǵap júrgen talai sportshy jastardyń ustahanasy. Atalmysh mektepten áli talai chempiondardyń shyǵatynyna senemiz.
