Ystambulda terakt jasady dep aiyptalǵan kúdikti Siriianyń Kobani qalasynda AQSh áskerileri sabaq bergen Kúrdistan jumysshy partiiasynyń (KJP) barlaý mektebinde oqyǵan, dep habarlaidy Azattyq Ruhy agenttigi RIA Novostige silteme jasap.
«Álbashir jaýap alý kezinde KJP-nyń siriialyq bólimshesimen bailanysy bar ekenin moiyndady. Terrorist óziniń Ain ál-Arabtaǵy (Kobani) KJP barlaý mektebinde oqyǵanyn, Siriiadaǵy amerikalyq sarbazdar da sabaq bergen mekemede ony arnaiy barlaý ofitseri retinde daiyndaǵanyn málimdedi», - dep habarlaidy Túrkiianyń Yeni Şafak basylymy.
Kúdikti ózine nusqaýlyq berip otyrǵan Ain ál-Arabtaǵy KJP/YPG/SDG uiymy jetekshisiniń senimdi adamymen bailanystary týraly da aityp bergen. Tiisti nusqaýlardy oryndaǵan boijetken tórt ai buryn Afrin Adlib arqyly Túrkiiaǵa zańsyz kirgen. Politsiia anyqtaǵandai, ol kúdik týdyrmas úshin uiymnyń bir ókilimen erli-zaiyptylarǵa uqsap, Ystambulda erkin júrgen.
Aita keterligi, Túrkiiada Kúrdistannyń jumysshylar partiiasyna tyiym salynǵan.
Eske salsaq, jeksenbi kúni Ystambul ortalyǵyndaǵy jaiaý júrginshilerge arnalǵan Istiklal kóshesinde jarylys bolyp, 6 adam qaza tapqan bolatyn, sondai-aq 81 adam jaralandy. Lańkestik iske kúdikti Ahlam Álbashir esimdi boijetken ustalyp, KJP-men bailanysy baryn moiyndady. Ishki ister ministrliginiń málimetinshe, shabýyl jasaý týraly buiryq Siriiamen shekaralas Kobani qalasynan túsken.
Tintý kezinde boijetkennen tólqujat, iri kólemdegi aqsha, tsifrlyq qurylǵylar men terakt uiymdastyrý týraly materialdar tabyldy. Sondai-aq 21 mekenjaida tintý jumystary júrgizilip, qaýipsizdik kúshteri barlyǵy 50 adamdy qolǵa túsirgen.
Olar Álbashirdi Grekiiaǵa jiberýge ýáde bergenimen, politsiia qolyndaǵy aqparatqa sáikes, shabýyldy uiymdastyrýshylar qyzdy Ystambulda óltirmek bolǵan.
Bir kún buryn Túrkiianyń ishki ister ministri Súleiman Soilý Ankaranyń lańkestik oqiǵaǵa bailanysty Vashingtonnyń kóńil aitýyn qabyldamaitynyn aityp, shabýyldyń qai jerde úilestirilgenin biletinin jáne Túrkiianyń «budan bylai mundai opasyz áreketterge esh tózbeitinin málimdegen bolatyn.
