Túrkiianyń Anadoly qalasynda Táýelsizdiktiń 30 jyldyǵyna orai «Alash» jáne Mahmut Qashqari halyqaralyq ádebi syilyǵynyń laýreaty, jazýshy Nurǵali Orazdyń túrik tiline aýdarylǵan «Qazyǵurt oqiǵalary» kitabynyń tusaýkeseri ótti, dep habarlaidy QazAqparat.
Saltanatty shara Qazaqstannyń Túrkiiadaǵy elshiliginiń uiymdastyrýymen jáne Ál-Farabi atyndaǵy Qazaq ulttyq ýniversitetiniń qoldaýymen HVI halyqaralyq Ankara kitap kórmesi aiasynda ótti.
Jinaqtyń alǵysózin jazǵan QazUÝ rektory Janseiit Túimebaev QazUÝ túlegi ári qyzmetkeri Nurǵali Orazdyń túrik tiline tárjimalanǵan «Qazyǵurt oqiǵalary» atty áńgimeler jinaǵy týys halyqtardy ádebiet arqyly jaqyndastyra túserine úmit artady.
Ál-Farabi atyndaǵy Qazaq ulttyq ýniversitetiniń baspasóz qyzmetinen málim etkendei, jinaqtyń tanystyrylymynda Qazaqstannyń Túrkiiadaǵy Elshisi Abzal Saparbekuly toptamanyń Qazaqstan Táýelsizdiginiń 30 jyldyǵy, Túrkiia Respýblikasynyń 100 jyldyǵy qarsańynda oqyrman qolyna tigenin, sondai-aq jinaqqa engen «Baqyt qusy», «Ońasha aral», «Túrik aspanyndaǵy qazaq juldyzy», «Aq tyrnalardyń uiasy», «Qazyǵurt oqiǵasy», «Biz, ol, mersedes jáne mahabbat», «Túndegi jetim tamshylar», «Qaiyrshynyń juldyzy», «Boranbai baron – teris aǵash» týyndylarynyń túrik aǵaiyndardyń kóńilinen shyǵaryna senim bildirdi.
Eýraziia Jazýshylar odaǵynyń tóraǵasy Iakýp Ómeroǵlý ózi basqaratyn «Bengý» baspasynan jaryq kórgen týyndynyń tarihi-mádeni salmaǵyn sipattap, Qazyǵurt taýlaryn kórip ósken qalamgerdiń sýretkerlik qyryn joǵary baǵalady.
Eýraziia Jazýshylar odaǵynyń basqarma múshesi, kitap aýdarmashylarynyń biri Jámila Kynajy qazaq ádebietiniń beldi ókili N.Orazdyń jazýshylyq stili men janrlyq erekshelikteri týraly baiandama jasap, ár shyǵarmanyń arqalaǵan júgi men kótergen mindetin jan-jaqty tanystyryp ótti.
Jazýshy Nurǵali Oraz óz kezeginde buǵan deiin jekelegen áńgimeleri túrik tiline aýdarylǵanymen, alǵash ret jeke kitap retinde jaryq kórgenin jetkizip, shara uiymdastyrýshylaryna rizashylyǵyn bildirdi.
