Túrkiiada qaraly kún: Órt qurbandary 76 ǵa jetti

Foto: BBC

Keshe Túrkiianyń soltústik-batysyndaǵy Kartalkaia shańǵy kýrortyndaǵy qonaq úide órt shyqqan. Búgin qurbandarynyń sany 76 adamǵa jetti. Bul týraly Túrkiianyń Ishki ister ministri Ali Erlikoia taraqtan aqparatqa silteme jasap, Ult.kz habarlaidy.

Órt jergilikti ýaqyt boiynsha 03:27-de Grand Kartal qonaq úiiniń 12 qabatty (basqa derekterde, 11 qabatty) ǵimaratynda bastalǵan. Qazir Túrkiianyń mektepterinde eki aptalyq qysqy demalys jalǵasyp jatqany jáne shańǵy maýsymynyń qyzǵan kezeńine sáikes qonaq úide 234 demalýshy bolǵan.

Bolý gýbernatory Abdýlaziz Aidynnyń aitýynsha, órt qonaq úidiń tórtinshi qabatyndaǵy meiramhana aimaǵynda bastalyp, joǵary qabattarǵa taralǵan. Qonaq úi Bolý ortalyǵynan aitarlyqtai qashyqta ornalasqany jáne sýyq aýa raiy saldarynan órt sóndirýshiler oqiǵa ornyna bir saǵattai keshigip jetken.

Qutqarý jumystary tańerteń de jalǵasqan.

Sol ýaqytta qutqarýshylar qonaq úidiń keibir bólikterine áli de kire almaǵany týraly habarlar taraǵan edi.

Túrik BAQ derekterine sáikes, kem degende eki adam qonaq úidiń terezelerinen sekirip, qaitys bolǵan. Keibireýler tósek-orynnan arqan jasap, terezelerden shyǵýǵa tyrysqan.

Shańǵy boiynsha nusqaýshy Nejmi Kepchetýtan túrik televideniesine bergen suhbatynda qonaq úidi jaqsy bilgendikten ózin qutqara alǵanyn, biraq ǵimarattyń qurylysymen tanys bolmaǵan qonaqtardyń múmkindikteri az bolǵanyn aitty.

«Ishinde qoiý tútin boldy. Adamdar terezelerden bizdi qutqaryńyz dep aiqailaityn. Biz 20-25 adamdy syrtqa shyǵaryp aldyq», - dedi ol NTV arnasyna bergen suhbatynda.

Órttiń sebebi áli anyqtalǵan joq. Ádilet ministri Iylmaz Týnch tergeýge prokýratýra ókilderi tartylǵanyn habarlady.

Túrkiia Prezidenti Rejep Taiyp Erdoǵan qaza bolǵandardyń otbasylaryna kóńil aityp, 22 qańtardy Jalpyulttyq aza tutý kúni dep jariialady.

"Qaiǵyly oqiǵaǵa qatysy barlar, sonymen qatar abaisyzdyq pen quqyq buzýshylyqtarǵa kináliler zań aldynda jaýap beredi", – dedi Rejep Taiyp Erdoǵan.

Qazaqstan SIM-niń resmi ókili Aibek Smadiiarov "órtten zardap shekkender arasynda Qazaqstan azamattaryn joq ekenin" málimdedi. Órttiń neden shyqqany belgisiz – úkimet oqiǵany tergeý úshin alty prokýror taǵaiyndaǵan.

Sondai-aq, Memleket basshysy Túrkiia Respýblikasynyń Prezidentine kóńil aitý jedelhatyn joldady.

Qasym-Jomart Toqaev jedelhatta Bolý provintsiiasynda ornalasqan Kartalkaia taý shańǵysy ortalyǵynda bolǵan órt saldarynan kóptegen adamnyń qaza tapqany týraly sýyt habardy tereń kúizelispen qabyldaǵanyn jetkizdi.

“Sonymen qatar Memleket basshysy Qazaqstan halqynyń jáne óziniń atynan Túrkiia Prezidenti Rejep Taiip Erdoǵan men jaqyndarynan aiyrylǵan otbasylarǵa, sondai-aq baýyrlas túrik halqyna kóńil aityp, zardap shekkenderdiń tez arada saýyǵyp ketýine tilektestik bildirdi”,- delingen Aqorda taratqan aqparatta.

Aita keteiik, osy oqiǵa boiynsha tergeý bastalǵaly toǵyz adam ustalǵan, olardyń qatarynda qonaq úi iesi de bar.