Túrkiiada jantúrshigerlik kólik apatyna ushyraǵan 7 qazaqstandyqtyń úsheýi elge aman-esen jetti, dep habarlaidy QazAqparat tilshisi.
Apat kezinde Vadim, Batyrhan, Diliara jeńil jaraqat alǵan. Taldyqorǵan qalasy ákimdigi baspasóz qyzmetiniń málimetinshe, jastar qazir Almaty qalasynda. Tiisti emderin alýda. Al, Nursultan, Almagúl, Asyl jáne Aidyn esimdi jastar áli de tósek tartyp jatyr. Qazir olardy elge jetkizýdiń qamy jasalýda.
«Bári órimdei jastar. 1992 jyly týǵan meniń baýyrym Nursultan sonaý mektep kezinen Almagúlmen júretin. Osy jaqynda ǵana, 9 qyrkúiekte toiyn ótkizgenbiz. Sonda dostary Túrkiiaǵa joldama syilaǵan edi. Bal aiynyń sońy osyndai bolady dep oilamappyz, áitpese jibermes edik qoi», - deidi Taldyqorǵan qalasynyń turǵyny Elzira.
Osy oqiǵaǵa bailanysty Taldyqorǵan qalasynyń ákimdigi apatqa túsken jastardyń ata-analarymen, týǵan-týystarymen habarlasyp, qandai kómekke muqtaj ekenderin surady. Ata-ananyń elge balalary aman-esen jetse, meditsinalyq turǵyda kómek kórsetilse deidi. Osyǵan bailanysty qala ákiminiń orynbasary oblystyq densaýlyq saqtaý basqarmasynyń basshysymen aqyldasyp, apatqa túsken jastardy kútip alý úshin bar jaǵdaidy qarastyryp jatyr. Qajet bolǵan jaǵdaida taldyqorǵandyq jastardy Almatynyń nemese Astananyń aýrýhanalaryna jatqyzýǵa da járdem kórsetilmek.
Esterińizge sala keteiik, 21-qyrkúiekte Túrkiianyń Kemer qalasy mańynda bolǵan jol apaty saldarynan 7 qazaqstandyq aýrýhanaǵa túsken edi. Der kezinde kórsetilgen meditsinalyq kómek pen hirýrgiialyq ota jastardyń janyn saqtap qaldy.
QR SIM baspasóz qyzmetiniń basshysy Ánýar Jainaqov Túrkiiada kólik apatyna ushyraǵan qazaqstandyq jastardy elge ákelý máselesi qarastyrylyp jatqandyǵyn habarlaǵan bolatyn.
