Qazaqstannyń Túrkiiadaǵy Elshiligi, QR Mádeniet jáne sport ministrligi, Túrkiia Mádeniet ministrligi, TÚRKSOI uiymy men «TRT Avaz» telearnasynyń qatysýymen Túrkiiadaǵy Abai jylyn saltanatty túrde ashty.
QR Syrtqy ister ministrligi baspasóz qyzmetiniń habarlaýynsha, saltanatty sharaǵa Qazaqstannyń Túrkiiadaǵy Elshisi Abzal Saparbekuly, QR Mádeniet jáne sport vitse-ministri Eldos Ramazanov, TÚRKSOI Bas hatshysy Dúisen Qaseiinov, «TRT Avaz» direktory Sedat Saǵyrkaia, Kechióren mýnitsipalitetiniń basshysy Týrgýt Altynok, Qoja Ahmet Iasaýi atyndaǵy Halyqaralyq qazaq-túrik ýniversitetiniń qamqorshylyq keńesiniń tóraǵasy Musa Iyldyz, sondai-aq Túrki keńesine múshe memleketterdiń elshileri, sheteldik diplomattar, ziialy qaýym ókilderi jáne qazaqstandyq stýdentter qatysty.
Is-sharany ashqan TÚRKSOI Bas hatshysy D. Qaseiinov Elbasy Nursultan Nazarbaevtyń «Abaidy taný – Qazaqstandy, qazaq halqyn taný» degen sózine nazar aýdaryp, túrki áleminiń mádeni astanasy - Osh qalasynda ótken Túrkitildes memleketterdiń mádeniet ministrleriniń jinalysynda 2020 jyl Abai jyly dep jariialanǵanyn eske saldy.
Eýraziia Jazýshylar odaǵynyń tóraǵasy Iakýb Ómeroglý Abai – qazirgi qazaq ádebietiniń negizin qalaýshy, túrki tildes halyqtardyń rýhani qazynasyna baǵa jetpes úles qosyp qana qoimai, qazaq halqynyń ult retinde qalyptasýyna yqpal etkenin atap ótti.
Saltanatty jiyn barysynda Elshi A. Saparbekuly Memleket basshysy Qasym-Jomart Toqaevtyń «Abai jáne Qazaqstan HHI ǵasyrdaǵy» atty maqalasynda ziiatkerlik ult qalyptastyrý ideiasy Abaidan bastaý alatynyn atap ótti. Óz sózinde ol uly oishyldyń adamgershilik murasyn zertteýdiń mańyzdylyǵyna toqtaldy.
Kesh sońynda Qazaqstan, Qyrǵyzstan, Moldova, Ózbekstan jáne Ázerbaijan ártisteri Túrkiianyń Prezidenttik simfoniialyq orkestriniń súiemeldeýimen Abaidyń mýzykalyq murasyn oryndady. Talantty ártister kórermenderdi uly aqynnyń «Aittym sálem, Qalamqas», «Jelsiz túnde jaryq ai», «Kózimniń qarasy» jáne t. b. Shyǵarmalary oryndady.
Sonymen qatar, «TRT Avaz» telearnasy saltanatty kontsertti tolyǵymen túsirip, 350 million kórermenge kontsertti kórýge múmkindik berdi.
