Adamzattyń aqylmanyna ainalǵan Abaidyń mereitoiy Túrkiiada atalyp ótti, dep habarlaidy "Ult aqparat".
Aqynnyń ádebi muralaryn keńinen nasihattaý maqsatynda Anadoly jerinde Qazaq ulttyq qyzdar pedagogikalyq ýniversiteti taǵylymdy shara uiymdastyrdy.
Oqý ornynyń resmi ókili – baspasóz qyzmetiniń jetekshisi Jandar Asannyń aitýynsha, Niide Ómer Halisdemir ýniversitetindegi Qazaq-túrik mádeni bilim berý ǵylymi-zertteý ortalyǵynda ótken jiyn baýyrlas memleketter arasyndaǵy ózara yntymaqtastyqty aiqyn ańǵartty.
«Qyzdar ýniversitetiniń delegatsiiasy atalǵan ortalyqqa Abaidyń shyǵarmalary men ol týraly irgeli zertteý eńbekteri toptastyrylǵan elý kitapty syiǵa tartty. Sondai-aq qazaqstandyq jetekshi joǵary oqý ornynyń bastamasymen «Abai taǵylymy» taqyrybynda kórme ashyldy», – dedi Jandar Asan.
Kórmeniń ashylý rásimine túrkiialyq ǵalymdar men atalǵan memlekette bilim alyp júrgen qazaq jastary qatysty.
Igilikti sharany Niide Ómer Halisdemir ýniversitetiniń oqý isi jónindegi prorektory Ilias Gýkhan ashyp, Abai qazaqtyń uly aqyny ǵana emes, sondai-aq túbi bir túrki dúniesine ortaq tulǵa ekendigin atap ótti. Sonymen qatar ol oishyldyń adamzattyń asyl murasyna ainalǵan shyǵarmalary álemniń 30-dan astam tilimen qatar túrik tiline de aýdarylǵanyn aitty.
«Ákeniń balasy emes, adamnyń balasy bolýdy maqsat tutqan aqynnyń qundy qazynasy óskeleń urpaqpen birge jasaityn máńgilik muraǵa ainalýy tiis. Osy oraida Qazaqstan Prezidenti Qasym-Jomart Toqaevtyń Abai haqyndaǵy maqalasy, oi-tolǵamy basty baǵdarsham bolýy tiis dep oilaimyn. Ol josparlanǵan sharalardyń barlyǵy «toi toilaý úshin emes, oi-órisimizdi keńeitip, rýhani turǵydan damýymyz úshin ótkizilmek» ekendigin atap ótti. Biz de óz tarapymyzdan aqyn mereitoiyn joǵary deńgeide ótkizýge atsalysamyz. Búgingi shara sonyń bastaýy ispettes. Túrkiia jurtshylyǵy úshin de Abaidyń ómirsheń poeziiasynyń orny bólek. Onyń ádebi týyndylarynyń astaryna úńilip qarasańyz úlken maǵyna jatyr. Onyń pálsapalyq ósietteri men shyǵarmalary ýaqytpen úndes iaki qanattas», – dedi Ilias Gýkhan.
Jiynda sóz alǵan Qyzdar ýniversitetiniń ókili uly aqynnyń taǵylymyna tereń boilaý – búgingi kúnde úlken mańyzǵa ie ekendigin baiandap, taǵylymdy iske uiytqy bolǵandarǵa izgi lebizin bildirdi.
«Abaiǵa bet burý, «ótkenniń arty, jańanyń basy edim» degen uly aqynnyń taǵylymyna tereń boilaý – búgingi kúnde úlken mańyzǵa ie. Abai – ulttyq bolmystyń aiqyn úlgisi. Abai – dala danalarynyń barsha jaqsy qasietteri men asyl muralaryn boiyna sińire otyryp, ult ádebieti men mádenietin hám qoǵamdyq oidy baǵa jetpes qazynalarmen baiytqan dana da dara tulǵa. Abai – adamzatqa ortaq tulǵa. Uly oishyldyń shyǵarmalary álemdik ádebiettiń altyn qoryna enýi bul sózimizge aiqyn dálel. 75 jyldyq tarihy bar ýniversitet ujymy atynan aqyn mereitoiy qarsańynda uiymdastyrylǵan sharanyń ótýine qoldaý kórsetken týysqan túrik baýyrlarymyzǵa alǵysymyzdy bildiremiz», – dedi óz sózderinde qazaqstandyq ǵalymdar.
Aldaǵy ýaqytta Túrkiiada bilim alyp júrgen qazaq jastarymen qatar kópshilik qaýym Niide qalasyndaǵy Qazaq-túrik mádeni bilim berý ǵylymi-zertteý ortalyǵynda Abai murasymen keńinen tanysýǵa múmkindik almaq. Bul bastama óz kezeginde týysqan halyqtar arasyndaǵy rýhani sabaqtastyqtyń artýyna yqpal etetindigi ras.
Kórmeniń ashylý rásiminde Halyqaralyq Túrki álemi zertteýleri simpoziýmynyń direktory, professor Hikmet Korash, Eýraziialyq zertteýler mamandyǵynyń basshysy, PhD Týrǵai Dúien, Qazaq-túrik mádeni bilim berý ǵylymi-zertteý ortalyǵynyń basshysy, professor Mýrat Barýt syndy syndy ǵalymdar da sóz sóilep, niettestigin bildirdi.
