Tuńǵysh Prezident kúnine arnalǵan "Jańa jahandyq bolmystaǵy Qazaqstannyń jańǵyrý modeli" halyqaralyq parlamenttik konferentsiiasynda Túrkiianyń Uly ulttyq jinalysy tóraǵasynyń orynbasary Ahmet Aidyn Qazaqstannyń latynǵa kóshý týraly bastamasynyń sátti iske asyrylýyna tilektestik bildirdi, dep habarlaidy Sputnik Qazaqstan tilshisi.
"Bizdiń elderimizdiń arasyndaǵy tamyry tereń qarym-qatynas ózara túsinistik negizinde damyp, strategiialyq yntymaqtastyq deńgeiine kóterildi. Mańyzdy máseleler boiynsha turaqty túrdegi dialog, eki el prezidentteriniń tyǵyz jáne dostyq qarym-qatynasy jáne joǵary deńgeidegi ózara is-saparlar barlyq sala boiynsha bailanystyń damýyna yqpal etti. Qazaqstanǵa biylǵy jyly qyrkúiekte jasaǵan resmi sapary barysynda Túrkiia prezidenti Erdoǵan aitqandai, biz eki el arasyndaǵy yntymaqtastyqty jańa baǵyttar boiynsha damytýǵa múddelimiz", — dedi Ahmet Aidyn.
Onyń aitýynsha, prezident Nazarbaevtyń kelesi jyly kóktemdegi Túrkiiaǵa josparlanǵan sapary bizdiń qarym-qatynasymyzdy odan ári nyǵaita túsetini sózsiz.
"Fethýllah Giýlenniń terroristik uiymynyń 15 maýsymda memlekettik tóńkeris jasamaqshy bolǵan áreketinen keiin Nursultan Nazarbaev birinshi bolyp bizdiń elimizge keldi. Osylaisha ol bizdiń elimiz ben halqymyzǵa qoldaý kórsetti", — dep atap ótti ol.
Túrkiia parlamentiniń ókili óz eliniń Qazaqstannyń bastamalaryna qoldaý bildiretinin jetkizdi.
"Latynǵa kóshý jónindegi sheshimniń sátti júzege asyrylýyna tilektespiz. Budan bólek, Qazaqstandy EKSPO-2017 kórmesin sátti ótkizýimen quttyqtaimyz. Bizdiń elimiz kórmege belsendi qatysty, biz úshin bul zor qurmet boldy", — degen Ahmet Aidyn "túrik áleminiń aqsaqaly Nursultan Nazarbaevtyń orasan eńbegin" atap ótip, qazaqstandyqtardy kele jatqan Tuńǵysh Prezident kúnimen quttyqtady.
