Foto: Akorda.kz
Qasym-Jomart Toqaev Túrki memleketteri uiymynyń H sammitine qatysý úshin Astanaǵa kelgen Túrkiia Prezidenti Rejep Taiip Erdoǵanmen kezdesý ótkizdi, dep habarlaidy "Ult aqparat" Aqordanyń resmi saityna silteme jasap.
Memleket basshysy Túrkiia Prezidentiniń Qazaqstanǵa saparynyń máni zor ekenin atap ótip, búgingi kezdesý eki eldiń kópjaqty qarym-qatynasyn nyǵaitýǵa jáne Túrki álemin damytýǵa tyń serpin beretinine nazar aýdardy. Qasym-Jomart Toqaev sammit barysynda kótergen mańyzdy bastamalary men salmaqty oi-pikirleri úshin Rejep Taiip Erdoǵanǵa alǵys aitty.
– Qadirli baýyrym, Atajurtqa qosh keldińiz! Túrkiia – bizdiń ejelden enshisi bir, tamyrlas týysymyz. Sondai-aq Qazaqstannyń eń jaqyn ári senimdi strategiialyq seriktesi. Siz ózara qarym-qatynasty damytýǵa orasan zor úles qosyp kelesiz. Men ony joǵary baǵalaimyn. Aradaǵy turaqty kelissózderdiń arqasynda búginde kóptegen kelisimderimiz tabysty júzege asyrylýda. Byltyr ekijaqty taýar ainalymy 54 paiyzǵa ósip, 6,3 milliard dollar boldy. Osy kórsetkishti 10 milliard dollarǵa deiin jetkizýdi kózdep otyrmyz. Túrkiia – elimizdiń negizgi tórt saýda seriktesiniń biri. Investitsiialyq yntymaqtastyq qarqyndy damyp keledi. Elimizde túrik kapitalynyń úlesi bar 4300-den astam kompaniia jumys istep jatyr, – dedi Qasym-Jomart Toqaev.
Kezdesýde Qasym-Jomart Toqaev Rejep Taiip Erdoǵandy jáne túrik halqyn Túrkiianyń 100 jyldyǵymen quttyqtady. Sondai-aq Memleket basshysy baýyrlas eldiń mereitoiyna orai Astanada Anadoly kóshesin, Shymkentte Túrkiia dańǵyly men saiabaǵyn jáne Almatyda Mustafa Kemal Atatúriktiń eskertkishin ashý josparlanyp otyrǵanyn aitty.
Óz kezeginde Rejep Taiip Erdoǵan Túrki memleketteri uiymynyń mereitoilyq sammitin joǵary deńgeide ótkizgeni úshin Qasym-Jomart Toqaevqa alǵys aityp, eki el arasyndaǵy ózara tiimdi yntymaqtastyqty nyǵaitý mańyzdy ekenin jetkizdi.
– Sammitti tabysty ótkizýińizben quttyqtaimyn. Biyl 6 aqpanda jer silkinisinen zardap shekken Gaziantep provintsiiasynyń Nýrdagy aýdanynda mektep salý týraly sheshimińiz úshin taǵy da alǵysymdy bildiremin. Bul mektep túrik-qazaq baýyrlastyǵynyń urpaqtan-urpaqqa jalǵasatyn simvoldarynyń birine ainalady dep senemin. Jahandaǵy jáne aimaqtaǵy oqiǵalar Túrki áleminiń ózara tyǵyz qarym-qatynasta bolýyn talap etedi. 2021 jyly Ystanbulda ótken sammitte biz ózgeris protsesin bastadyq ári bizdiń uiymǵa myqty institýtsionaldyq qurylym sipatyn berý týraly sheshim qabyldadyq. Osy ýaqyt aralyǵynda biz mańyzdy qadamdar jasadyq. Ol áli jalǵasady. Atajurtta maǵan jáne meniń delegatsiiama kórsetken qurmetińiz úshin Sizge rizashylyǵymdy bildiremin, – dedi Túrkiia Prezidenti.
Kezdesý barysynda memleketter basshylary qazaq-túrik strategiialyq seriktestiginiń qazirgi jaǵdaiy men damý perspektivalaryn talqylady. Saiasi dialogty nyǵaitýǵa, saýda-ekonomikalyq, investitsiialyq, energetikalyq, kólik-logistikalyq, agrarlyq jáne mádeni-gýmanitarlyq salalardaǵy yntymaqtastyqty tereńdetýge basa mán berildi. Prezidentter Qazaqstan men Túrkiianyń jan-jaqty yqpaldastyǵyn jańa deńgeige kóterýge bailanysty barlyq jaǵdai jasalǵanyn atap ótti.
Sonymen qatar Qasym-Jomart Toqaev pen Rejep Taiip Erdoǵan halyqaralyq jáne aimaqtyq kún tártibindegi ózekti máseleler jóninde pikir almasty.
