Túrkiia áskeri 9 qazan keshkisin Siriianyń soltústiginde áskeri operatsiia bastady. Bul týraly Túrkiia prezidenti Rejep Taiyp Erdoǵan málimdedi.
Erdoǵannyń sózinshe, bul operatsiianyń maqsaty – DAISh terrorlyq tobymen jáne kúrdtermen kúres.
Ankara áskeri operatsiia arqyly Siriia men Túrkiia shekarasynyń mańynda qaýipsiz aimaq quryp, siriialyq bosqyndardy osy jerge ornalastyrýdy kózdeidi.
Kúrd jasaqtary men arab jasaqtary AQSh basqaratyn halyqaralyq koalitsiia men BUU-ny Siriianyń soltústik-shyǵysynda ushaq ushpaityn aimaq qurýǵa shaqyrdy. Olardyń aitýynsha, Ankaranyń operatsiiasy "gýmanitarlyq apatqa" ákeledi.
Siriia syrtqy ister ministrligi Túrkiianyń "qaýipsizdik aimaǵyn qurý" ideiasyn "halyqaralyq quqyqtardy buzý" dep baǵalady.
Máskeý bul operatsiiaǵa aralaspaitynyn, "reseilik áskeriler Siriiada basqa maqsatta júrgenderin" málimdedi.
Demalys kúnderi Túrkiia prezidenti Rejep Taiyp Erdoǵan Siriianyń soltústik-shyǵysyna ásker kirgizetinin jariialaǵan.
Siriialyq kúrdter – AQSh-tyń "Islam memleketi" terroristik tobymen kúreste negizgi seriktesi. Al Túrkiia kúrd jasaqtaryn "terrorlyq top" dep sanaidy.
6 qazanda AQSh prezidenti Donald Tramp pen Túrkiia prezidenti Erdoǵan telefonmen sóilesip, Ankaranyń áskeri operatsiiasyn talqylaǵan. Keiin Tramp ákimshiligi bul operatsiiaǵa qatyspaitynyn málimdep, amerikalyq áskeriler Siriianyń soltústik-shyǵysyn tastap kete bastaǵan.
Biraq Tramp "eger Ankara artyq ketse, Túrkiianyń ekonomikasyn kúl-talqanyn shyǵaratynyn" aitty.
