Túrkiia basshysy Rejep Erdoǵan Qazaqstanǵa jumys saparymen kelmeitin boldy, dep jazady Sputnik agenttigi RIA Novosti-ǵa silteme jasap.
Ol Túrkistanda ótetin Túrki keńesiniń beiresmi sammitine beinebailanys arqyly qosylady.
"Prezidentimizdiń 30-31 naýryzǵa josparlanǵan Qazaqstan jumys sapary bolmaityn boldy. Ol sammitke onlain rejiminde qosylady", - delingen Túrkiia prezidenti ákimshiliginiń habarlamasynda.
Eske sala ketsek, Rejep Erdoǵannyń Túrkistanǵa keletini týraly ótken aptada habarlanǵan edi.
2009 jyldyń qazan aiynda qurylǵan Túrki keńesi zamanaýi túrki memleketterin biriktirgen halyqaralyq uiym. Maqsaty - elder arasyndaǵy jan-jaqty áriptestikti damytý. Uiymǵa Qazaqstan, Ázerbaijan, Qyrǵyzstan, Túrkiia jáne Ózbekstan múshe, al Vengriia baiqaýshy rólinde.
