Qyrǵyzstandaǵy túrik mektepter jelisiniń jetekshisi Orhan Inandyny tabýdy talap etken aktsiia. Bishkek, 3 maýsym 2021 jyl.
2019 jyly Qyrǵyzstan Túrkiianyń Orhan Inandyny ekstraditsiialaý týraly ótinishin oryndaýdan bas tartqan. Bul týraly 7 maýsymda Qyrǵyzstan syrtqy ister vitse-ministri Aibek Artykbaev habarlady, dep jazady Azattyq.
"Orhan Inandy 2012 jyly prezident jarlyǵyna sáikes Qyrǵyzstan azamattyǵyn aldy. 2019 jyly naýryzda Túrkiia Inandynyń FETO terroristik tobynyń múshesi ekenin aityp, ony ekstraditsiialaýdy talap etti. Túrkiiamen arada ekstraditsiia jaily kelisim bar. Biraq biz ishki ister ministrligi men bas prokýratýra mamandarymen birige otyryp, jaýap ázirledik. 2012 jyly Inandynyń Qyrǵyzstan azamaty ekenin jáne Túrkiiaǵa óz azamatymyzdy bere almaitynymyzdy aitqanbyz" dedi vitse-ministr.
Halyqaralyq "Sapat" bilim berý mekemesiniń prezidenti Orhan Inandy 1 maýsymǵa qaraǵan túni Bishkekte joǵalyp ketken. Quqyq qorǵaý organdary muǵalimdi tabýǵa kóp kúsh jumsaǵanyn habarlady. "Adam urlaý" baby boiynsha qylmystyq is qozǵalǵan.
Inandynyń joǵalýy qyrǵyz qoǵamynda rezonans týdyrdy. Prezident Sadyr Japarov izdeýdi kúsheitýdi tapsyrdy, al Qaýipsizdik keńesi 3 maýsymda quqyq qorǵaý organ jetekshilerimen oqiǵaǵa bailanysty shuǵyl kezdesý ótkizdi.
Buǵan deiin azamattar Qyrǵyzstannyń Túrkiiadaǵy elshiligi, Aq úi, úkimet úii aldynda Orhan Inandyny tabýdy talap etip, miting ótkizgen. Olar Inandyny Túrkiianyń arnaiy qyzmeti urlap ketken bolýy múmkin dep topshylaidy.
"Sapat" bilim berý mekemesi Orhan Inandynyń qaida ekenin habarlaityn adamǵa syiaqy taǵaiyndady.
6 maýsymda onyń áieli Reihan Inandy áleýmettik jelide bireýlerdiń kúieýin Qyrǵyzstandaǵy Túrkiia elshiliginde kúshpen ustap otyrǵanyn habarlady dep aitqan.
