Túrkiia áskeri qyzmetkerleri jaqynda óltirilgen "Islam memleketi" terror uiymynyń jetekshisi Ábý Bákir ál-Baǵdadidiń bir áielin qolǵa túsirdi. Bul aqparatty Túrkiia Prezidenti Rejep Erdoǵan málimdedi. 6 qarashada Ankara ýniversitetinde sóilegen ol operatsiianyń jai-japsaryn aitpady.
"Biz onyń áielin ustadyq, biraq shý kótergen joqpyz. Siriia aýmaǵynda odan bólek onyń ápkesi men kúieý balasy ustaldy" dedi Erdoǵan. Ol ál-Baǵdadidiń áielin áskeriler qashan qolǵa túsirgenin de aitpady.
Ábý Bákir ál-Baǵdadidiń qansha áieli bolǵany ázirge belgisiz. AP agenttiginiń jazýynsha, onyń tórt áieli bolǵan. Iraktaǵy qupiia derekkózge súiengen Reuters agenttigi onyń úsh áieli bolǵanyn aitady.
5 qarashada túrik áskerileri ál-Baǵdadidiń ápkesin qolǵa túsirgenin aitqan. Rasmiia Avad Siriianyń soltústik-batysynda jasyrynǵan. Onymen birge onyń kúieýi, kelini, bes balasy qamaýǵa alynǵan.
"Islam memleketi" terror uiymynyń basshysy Ábý Bákir ál-Baǵdadi ótken aida AQSh áskeriniń arnaiy operatsiiasy barysynda ózin-ózi jaryp jibergen. Osy reid kezinde "Islam memleketi" týraly mańyzdy aqparattary bolýy múmkin qujattar tabylǵan.
