Túrkiia áskeri Siriianyń úkimet kúshterine soqqy jasady, buǵan deiin Idlib provintsiiasynda Asad áskeriniń shabýylynan keminde 33 túrik sarbazy mert bolǵan edi. NATO Damask pen Máskeýdi aýmaqty jón-josyqsyz bombalady dep aiyptady.
"Siriia rejiminiń bizge belgili nysandaryn áýeden de, jerden de atqyladyq jáne atqylai beremiz" dedi 27 aqpanda Ankara ókili Fahrettin Altýn.
Anadolu agenttiginiń habarlýynsha, Túrkiianyń syrtqy ister ministri Mevliýt Chavoshoglý Asad áskeriniń shabýylynan keiin NATO bas hatshysy Iens Stoltenbergpen telefon arqyly sóilesken. Stoltenberg Idlib provintsiiasyndaǵy "Siriia rejiminiń áýe soqqysy men oǵan dem berýshi Reseidi" aiyptap, shabýyldy toqtatýǵa shaqyrǵan. Ol aimaqta gýmanitarlyq jaǵdaidy onan saiyn ýshyqtyrmas úshin taraptardy kelisimge kelýge úndegen.
Al AQSh málimdemesinde Ankarany S-400 reseilik zenitti zymyran júiesin satyp almaýǵa shaqyryp, "shynaiy odaqtastyń kim ekenin túsinetin mezgil jetti" dep aitqan.
Idlib provintsiiasynda shabýyl kesirinen aýrýhanalar, mektepter men bosqyndar lageri qiraǵanyn aitqan BUU-daǵy Frantsiia ókili "Asad áskeri men onyń odaqtasy Reseidiń osy aýmaqty úzdiksiz bombalaýyn" aiyptady.
