Túrkistan qalasyn damytýda aýqymdy jumystar atqarylýda. Qalanyń ákimshilik-iskerlik ortalyǵynda áleýmettik nysandar men turǵyn úilerge 100 shaqyrym injenerlik infraqurylym tartylǵan, dep habarlaidy "Ult aqparat".
Oblys ákimi Ómirzaq Shókeev halyqpen esep berý kezdesýinde atap ótkendei, óńirdiń áleýmettik-ekonomikalyq damýy men saiasi turaqtylyqty qamtamasyz etý boiynsha jumystar óz jalǵasyn taýyp keledi. Al, rýhani-mádeni ortalyqta qurylysy júrzilgen 9 nysannyń jeteýi paidalanýǵa berilgen. Sonymen qatar, Tuńǵysh Prezident saiabaǵy, N.Nazarbaev alleiasy (Arbat), jelilik saiabaqtar, gúlzarlar, Qoja Ahmet Iasaýi men Rábiia Sultan Begim kesenelerin qalpyna keltirý jumystary júrgizilgen. Áziret Sultan qoryq murajaiynyń aýmaǵyn abattandyrý, Kúltóbe kóne qonysynyń tarihi oryndaryn qalpyna keltirý jumystary atqarylýda. Buǵan qosa, ákimshilik-iskerlik ortalyǵynda 28 gektar aýmaqqa Dendrosaiabaǵynyń qurylysy jáne 9 gektar aýmaqqa saiabaqtyń janynan jasandy kóldiń qurylysy bastalǵan.
«Jalpy, qala turǵyndaryn ómir sapasyn jaqsartý men ál-aýqatyn arttyrý maqsatynda búgingi tańda qala halqyn qajetti injenerlik infraqurylym júilerimen qamtamasyz etilýde. Onyń ishinde erekshe toqtap atap ótetin bolsam, Túrkistan qalasyn tolyq tabiǵi gazben gazdandyrý máselesi bolatyn. Gaz qubyrlaryn tartý jumystary 100 % aiaqtalyp, 42 myńnan astam abonent gazben jabdyqtaý jelilerine qosylyp, 26 400 abonent (63%) kógildir otyn tutynýda. Budan bólek, ákimshilik - iskerlik ortalyǵynda jalpy aýdany 465,3 myń sharshy metr nemese 9052 páterdi quraityn 177 kóp qabatty turǵyn úidiń qurylysy júrgizilýde. Jyl qorytyndysymen 28 úidiń qurylysy aiaqtalyp, 1150 páter paidalanýǵa berildi», - dedi Ómirzaq Shókeev.
Óńirdiń áleýeti men týrizm salasyn kóteretin birden-bir iri joba Túrkistan qalasynyń halyqaralyq áýejaiynyń qurylysyn atap ótýge bolady. Túrkistan halyqaralyq áýejaiy byltyr elimizdiń Tuńǵysh Prezidenti – Elbasy N.Á.Nazarbaevtyń qatysýymen tehnikalyq iske qosylyp, 1 jeltoqsanda Nur-Sultan qalasyna alǵashqy áýe reisi usha bastady. Búginde áýejaidan Nur-Sultan jáne Almaty qalalaryna áýe reisteri oryndalýda. Aldaǵy ýaqytta elimizdiń ózge qalalaryna jáne shetelge áýe reisterin uiymdastyrý josparlanyp otyr. Sonymen qatar, jeke salymshylar tarapynan «Kerýen - Sarai» kesheni, halyqaralyq standartqa sai «Rixos Turkistan», «Hampton by Hilton Turkistan», «NurÁlem» qonaq úileri syndy iri jobalar salyndy. «Kerýen - Sarai» kesheni –kóne shahardyń sáýletine kórik beretin shyǵys úlgisindegi kópfýnktsionaldy zamanaýi týristik joba sanalady. Jalpy, Túrkistan qalasynyń Bas josparyna sáikes, oblysta alǵash ret 7 700 ga aýmaqqa Jasyl beldeý qurylyp, ótken jyly 2400 ga aýmaqqa 1 millionnan astam kóshet otyrǵyzyldy. Josparlanǵan meje biyl tolyǵymen iske asyrylmaq.
