Memleket basshysynyń respýblika boiynsha 2 mlrd. aǵash kóshetterin otyrǵyzý tapsyrmasyn oryndaý barysynda Túrkistan oblysy boiynsha 5 jylda 132 myń gektar jerge 210 millionan asa kóshet otyrǵyzý josparlanǵan. Qazir bul baǵytta jumys júrip jatyr. Sonymen qatar oblys ákimdiginiń bastamasymen Túrkistanda 2019-2022 jyldary qala ainalasynan 7700 ga jerge «Jasyl beldeý» qurý josparlandy. Búgingi tańda barlyǵy 13629 ga jerge kóshetter egilip, kútip-baptalýda. Aldaǵy ýaqytta «Jasyl beldeý» aýmaǵyn 30 myń gektarǵa jetkizý kózdelýde.
Egilgen orman aǵashtarynyń birinshi, ekinshi jyldarynda 25 paiyzynyń jersinbei qýrap qalýy – tabiǵi zańdy qubylys. Óitkeni Túrkistan qalasynyń klimaty kúrt kontinetaldy. Qýraǵan aǵashtardyń ornyna qaita jaiqaltý maqsatynda orman ekpelerin tolyqtyrý jumystaryn júrgizý mańyzdy. Ǵylymi-zertteý institýtynyń bergen qorytyndysyna sáikes, mádeni orman ekpeleriniń kónimdiligi 55%-dy quraityndyǵy dáleldengen.
Bir gektar orman jylyna 18 mln. tekshe metr aýany tazartyp, 1 saǵat ishinde 8 keli kómirqyshqyl gazyn sińiredi. Bul 200 adamnyń 1 saǵatta bólip shyǵaratyn kómirqyshqyl gazynyń kólemimen teń. Taza aýa – adamzattyń tirshiligi men densaýlyǵynyń tiregi. Túrkistan oblysy tabiǵi resýrstar jáne tabiǵat paidalanýdy retteý basqarmasynyń málimdeýinshe, búginde, Túrkistan qalasynyń ekologiialyq jaǵdaiyn jaqsartý maqsatynda qala aýmaǵynda saiabaqtar men alleialardyń kólemi artyp, 495 gektarǵa jetti. Oǵan qosa, qala aýmaǵynda kógaldandyrýdyń jańa tehnologiialaryn qoldaný nátijesinde kóshetterdiń ónimdiligi artyp, gazondardyń jaqsy ónip-damýyna qol jetkizildi.
Jaýapty mamandardyń málimdeýinshe, Túrkistan qalasynda atmosferalyq aýanyń lastanýy 65%-ǵa tómendegen. Túrkistan qalasynyń ekologiialyq jaǵdaiy turaqtalyp, anaǵurlym jaqsaryp keledi. Buǵan sý júielerin jańǵyrtý, jasyl alqaptardyń kóbeiýi, qalanyń tolyqtai tabiǵi gaz júiesine qosylýy oń áserin berip otyr.
Budan bólek, oblystyń orman sharýashylyǵy mekemeleriniń tuqymbaqtarynda 30 million danadan astam ártúrli orman aǵashtarynyń kóshetteri ósirilip jatyr. Aldaǵy ýaqytta ol kóshetterdiń sanyn 60 millionǵa jetkizý josparlanýda. Mamandardyń aitýynsha, bul jumystar oblystyń aýdan, qala jáne eldimekenderinde jasyl jelek qurý men kógaldandyrýǵa, ekologiianyń turaqtanýyna oń áserin tigizedi.
