QR Premer-Ministri Asqar Maminniń tóraǵalyǵymen ótken Úkimet otyrysynda Túrkistan qalasyn damytýdyń jańa bas jospary qaraldy, dep habarlaidy primeminister.kz saity.
«Elbasy Nursultan Ábishuly Nazarbaevtyń tarihi bastamasy men sheshiminiń arqasynda túrki áleminiń mádeni-rýhani astanasy retinde qasietti Túrkistan qalasyn damytýǵa úlken serpin berildi. Memleket basshysy Qasym-Jomart Kemeluly Toqaev Túrkistannyń damýyna erekshe kóńil bóledi. Qazirgi tańda Túrkistan qalasy Qazaqstannyń rýhani jańǵyrýynyń simvoly men el maqtanyshyna ainaldy», — dedi Mamin.
Úkimet basshysy Túrkistannyń jańa damýyn qamtamasyz etý, tarihi qundylyqtardy saqtai otyryp, ony odan ári órkendetý maqsatynda 2018 jylǵy qyrkúiekte Túrkistan qalasyn damytýdyń bas josparynyń tujyrymdamasy maquldanǵanyn atap ótti.
Qysqa merzimde aýqymdy jumys atqaryldy. Tarihi-sáýlet, ákimshilik-iskerlik ortalyqtardyń, kólik jáne injenerlik infraqurylymnyń, turǵyn úi aimaǵynyń qurylysy qarqyndy túrde júrgizildi.
Oblys ortalyǵy Túrkistanǵa kóshirilgen kúnnen bastap qalanyń negizgi kapitalyna shamamen 400 mlrd teńge investitsiia baǵyttaldy. Jańa bas josparǵa sáikes qala aýmaǵy 3 myń gektarǵa jýyq ulǵaidy. Halyq sany 165 myńnan 176 myń adamǵa deiin ósti, 2025 jylǵa qarai ol shamamen 250 myń, al 2035 jylǵa qarai 350 myń adam bolady dep boljanyp otyr.
Úkimet basshysy Túrkistandy damytýdyń jańa bas jospary belsendi damyp kele jatqan qalanyń barlyq qajettilikterin eskeretinin jáne onyń turǵyndary men qonaqtary úshin tolyqqandy jaily orta qurýǵa jol ashatynyn atap ótti. Jospar qalanyń jáne Túrkistan oblysynyń atqarýshy organdarymen, sondai-aq ortalyq memlekettik organdarmen kelisildi. Qala infraqurylymyn damytýdyń barlyq egjei-tegjeili shemalary ázirlendi.
Premer-Ministr bekitilgen jospardyń barlyq jobalaryn júzege asyrýdy tapsyrdy.
Aita keteiik, jiynda Túrkistan oblysynyń ákimi Ó. Shókeev, indýstriia jáne infraqurylymdyq damý birinshi vitse-ministri Q. Óskenbaev baiandama jasady.
