Búgin Túrkistan qalasynda jańa filmniń tusaýy kesildi. TURKISTAN telearnasy ótken jyly alǵashqy kinotýyndysyn túsirgen bolatyn. Komediialyq melodrama janryndaǵy «Káris kelin» filmi ómirdegi shynaiy oqiǵaǵa negizdelgen, dep habarlaidy "Ult aqparat".
Filmde Sáken esimdi túlkibastyq jigit pen ońtústikkoreialyq Sýdjin Li esimdi qyzdyń arasyndaǵy syrly sezimge toly hikaia baiandalady.
Koreiada 5 jyl jumys istegen Sáken 2023 jyly Sýdjin Lidi qarashańyraǵyna kelin etip túsirgen.
Búginde jas otbasy tatý-tátti ómir súrip jatyr.
Kinoda Sýdjin Lidiń Qazaqstanǵa kelgen alǵashqy kúnderde bastan keshken oqiǵalary sýretteledi.
Sondai-aq, tyrnaqaldy týyndyda eki jastyń mahabbaty arqyly otbasy qundylyqtary, qazaqy dástúrler keńinen nasihattalady.
Sonymen qatar, jańarǵan Túrkistan qalasy men Túrkistan oblysynyń tabiǵaty kórermenge jan jaqty kórsetiledi.
Film stsenariiin telearna qyzmetkerleri birlese jazyp shyqqan. Bul týyndy alǵashqyda teleserial retinde túsirilgen.
Degenmen kórermen tarapynan suranys bolǵandyqtan tolyq formatty film óńdelip, kinoteatrdan da kórsetý josparlanyp otyr.
Basty rólderdi Shymkent qalasy men Túrkistan oblysynyń kásibi akterleri somdaidy.
Film Túrkistan qalasy men Tólebi aýdanynda bar bolǵany 9 kúnde túsirilgen.
