Búgin Túrkistan oblysy Saryaǵash aýdanynda «ELBASY JOLY.ASTANA» filminiń kórsetilimi ótti. Memleket basshysynyń júrip ótken dańǵyl jolynan syr shertetin týyndynyń kórsetilimine oblys basshysy Janseiit Túimebaev qatysty. Sondai-aq, oblys ardagerleri men ziialy qaýym ókilderi, BAQ qyzmetkerleri men óńir turǵyndary tamashalady.
«Elbasy joly. Astana» filmi bolǵan oqiǵanyń jelisinde túsirilgen. Ǵumyrnamalyq týyndynyń avtory belgili rejisser Aqan Sataev. Shyǵarmada elordanyń kóshýi, sol kezeńdegi qiyndyqtar, jappai qurylys pen memleket qurýdaǵy ilgeri ister sýrettelgen.
Shyǵarmanyń kórsetilimine qatysqan oblys ákimi jiylǵan qaýymdy Táýelsizdik merekesimen quttyqtap, filmge tuzdyq bolar óz estelikterimen de bólisti.
«Sizderdi Ulyq merekemiz – QR Táýelsizdigi kúnimen shyn júrekten quttyqtaimyn! Táýelsizdik kúni – Qazaqstannyń árbir azamaty úshin qasterli mereke. Ǵasyrlar boiy azattyq ańsaǵan eldiń armany osydan 27 jyl buryn oryndalyp, memleketimiz óz táýelsizdigin jariialady. Tuńǵysh Prezidentimiz – Ult Kóshbasshysy Nursultan Nazarbaevtyń saliqaly saiasatynyń arqasynda biz zamanaýi, ashyq ári demokratiia qaǵidalaryna adal qoǵam qura bildik. Búgin nazarlaryńyzǵa usynylyp otyrǵan «Elbasy joly. Astana» filmi el astanasynyń Almatydan Aqmolaǵa kóshirilgen sátin sipattaidy. Elbasymyz elordany Aqmolaǵa kóshirý jónindegi oiyn bildirgen sátte ol sheshimdi qoldamaǵandar kóp boldy. Degenmen, Astana ultty uiystyryp, qazaqtyń mártebesin kótergen ordaǵa ainaldy. Elbasymyzdyń tarihi sheshimi durys ekenin ýaqyt dáleldep berdi. Prezidentimizdiń Táýelsizdigimizdi tuǵyrly etý jolyndaǵy qajyrly eńbegi men igi bastamalaryn el biledi jáne qurmetteidi», - dedi Janseiit Qanseiituly.
Filmniń basty keiipkeri - memlekettik qyzmetker. Ol Elbasynyń qasynda júrip ótkenin eske alady. Nursultan Nazarbaevtiń rólin belgili akter Murat Aqmanov somdaǵan. Film tarix xronologiiasyna sai naqty datalarmen jáne sol tusta túsirilgen tarihi beinelermen kórkemdelgen.
Elbasy ǵumyrnamasy men elorda tarihyna negizdelgen film túrkistandyq kórermen qaýymnyń kóńilinen shyǵyp, týyndyǵa joǵary baǵalaryn berdi.
