Shymkent qalasynda estý qabileti zaqymdanǵan sportshylar arasyndaǵy Qazaqstan Respýblikasynyń III spartakiadasy ótti, dep habarlaidy «Ult aqparat».
Tórt jylda bir ret ótkiziletin jarysqa elimizdiń 18 óńirinen kelgen 800-den astam sportshy baq synady. Sýrdlimpiada sportshylary jarysta sporttyń 11 túrinen 150 medaldy ózara sarapqa saldy.
Túrkistan oblysy ákimdiginiń baspasóz qyzmetiniń habarlaýynsha, Spartakiadaǵa Túrkistan oblystyq múgedekterge arnalǵan «Saýran» sport klýbynyń sportshylary qatysyp, júldeger atandy. Oblys namysyn qorǵaǵan saiypqyrandar 3 altyn, 3 kúmis, 5 qola medal ielendi.
Sport klýbynyń direktory Abai Iztileýulynyń aitýynsha, óńirimizdiń myqtylary sanalatyn sportshylar doiby, qol kúresi, taekvondo, erkin jáne dziýdo kúresi sport túrleri boiynsha synǵa túsken.
Tarqatyp aitsaq, Jasulan Seiilhanov qol kúresinen, Álibi Qanybekov dziýdo kúresinen, Baqytjan Badanov doibydan chempion atandy. Sondai-aq Qaiyrjan Perneev erkin kúresten, Jasulan Seiilhanov naiza laqtyrýdan, al Zarina Myqtybai doibydan kúmis júldege laiyqty ekendigin dáleldedi. Al Ihtier Asrorov dziýdo kúresinen, Shekerbek Jaýǵashev jáne Meiirman Perneev doibydan, Erbýl Abdýrazakov pen Rysai Baqtybai taekvondodan qola júlde aldy.
Eske sala ketsek, estý qabileti zaqymdanǵan sportshylar arasyndaǵy alǵashqy spartakiada 2014 jyly Almaty qalasynda sporttyń 5 túrinen ótse, II spartakiada 2018 jyly Aqtóbe qalasynda sporttyń 10 túrinen ótken bolatyn.
