Kókpardan jastar arasynda apta boiy jalǵasqan Qazaqstan chempionatynda Túrkistan oblysynyń «Qulager» komandasy bas júldege ie boldy, dep habarlaidy "Ult aqparat".
Sonymen qatar, ulttyq sport túrleri aýdaryspaq, jamby atý jəne teńge ilýden ótken elishilik jarystardyń jeńimpazdary men júldegerleri de anyqtaldy.
Kileń myqty jigitter baq synasqan kókpar dodasyna elimizden 9 komanda qatysty. Biyl 15-ret jalaýy jelbiregen shabandozdar saiysynyń aqtyq synynda Túrkistan oblysynyń komandasy Jambyl oblysynan kelgen «Áýlieata» kókparshylaryn 6:2 eseppen oisyrata jeńdi.
Jambyl oblysynyń kókparshylary - kúmis júldeger, Almaty qalasynyń quramasy - qola júldeger atandy.
Sonymen qatar, ulttyq sport túrlerin jańǵyrtý maqsatynda aýdaryspaq, teńge ilý jəne jamby atýdan da biylǵy Qazaqstan chempionatynyń jeńimpazdary anyqtaldy.
Apta boiyna jalǵasqan jarysta bilekti de qaisar jigitter arasynda aýdaryspaqtan 4 salmaqta túrkistandyqtar jeńimpaz atandy.
Máselen, 70 kelide jeńistiń tuǵyrynan túrkistandyq Daryn Ótkelbai kórinse, 80 kelide Rasýl Quraiysh, +80 keli salmaqta Ǵabit Aǵabektiń baǵy jandy. Teńge ilýden Ǵalymjan Izjanovtyń mereii ústem boldy.
Al, jamby atý jarysynda Jambyl oblysynyń sańlaǵy Baqdəýlet Babajan jeńimpaz atandy. Túrkistandyqtar Batyr Beksaýyt - kúmis alqa, Eralhan Aikóz - qola júldeni qanaǵat etti.
Jarys sońynda jeńimpazdar men júldegerler arnaiy diplommen marapattaldy.
Sondai-aq, aýdaryspaqtan «Úzdik sportshy» atanǵan Rasýl Quraiysh pen kókpardan «Úzdik salymshy» nominatsiiasyna ie bolǵan Sabyr Baqdaýletke gramotalar tabys etildi.
Al, jankúierlerdi óziniń talantymen tań qaldyrǵan Namyskók atty sáigúlik «Úzdik at» atandy.
