Portýgaliianyń Vila-Real-di-Santý-Antoniý qalasynda sporttyń jeńil atletika, paýerlifting, sýǵa júzý túrlerinen halyqaralyq jarys ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Para jeńil atletika saiysyna 34 memlekettiń atletteri qatysyp, kil myqtylar anyqtaldy.
Qazaqstan atynan sporttyń úsh túrinen: parajeńil atletika, parajúzý jáne parapaýerliftingten 27 sportshy qatysty. Nátijesinde parasportshylarymyz jarysta 14 altyn, 20 kúmis jáne 20 qola medal jeńip aldy.
IWAS dúniejúzilik oiyndarynda Túrkistan oblystyq múgedekterge arnalaǵan «Saýran» sport klýbynyń sportshylary baq synap, joǵary nátijege ie boldy. Aitap aitqanda, saiysta el namysyn qorǵaǵan Muqan Aitmyrzaev naiza laqtyrýdan úzdik úshtiktiń qatarynan kórindi. Temirbek Toǵanbai 100 metrge júgirýden jáne disk laqtyrýdan qola medal aldy. Sondai-aq, Shahrýh Sanvar 100 jáne 200 metr qashyqtyqqa júgirý men uzyndyqqa sekirýden qola medalǵa qol jetkizdi.
Sportshylarǵa jetekshilik jasap atalǵan týrnirge arnaiy barǵan sport klýb direktory Abai Qazievtiń aitýynsha, bul dodada júldeger atanýdyń ózi mártebe. Álem jurtshylyǵy aldynda Kók bairaǵymyzdyń kókke kóterilýi kúlli Qazaq eliniń jeńisiniń jemisi.
Jalpy Túrkistan óńiri boiynsha 130-dan astam parasportshy bar. Qurylǵanyna 1 jyl tolǵan «Saýran» sport klýbynyń sportshylary oblys qorjynyn 28 altyn, 23 kúmis, 30 qola medalmen tolyqtyrǵan.
Aita ketsek, IWAS oiyndary – bul múgedekter arbasyna tańylǵan jáne ampýtatsiia jasalǵan jandarǵa arnalǵan halyqaralyq sport. Dúniejúzilik oiyndar ár eki jyl saiyn ótedi. IWAS uiymyna 73 memleket kiredi.
