Túrkistan oblysy ákiminiń orynbasary Ermek Kenjehanuly men oblystyq aýyl sharýashylyǵy basqarmasynyń ókilderi Jambyl oblysyna bardy, dep habarlaidy «Ult aqparat» oblys ákimdiginiń baspasóz qyzmetine silteme jasap.
Maqsat – sharýalarǵa jeńildetilgen nesie berý arqyly júzege asqan «aýyl turǵyndarynyń tabysyn arttyrý» jobasy boiynsha tájiribe almasý. 2019 jyly Jambyl oblysynda aýyl turǵyndarynyń tabysyn arttyrý maqsatynda úiirgelik aýmaqtardy igerý arqyly aýyl sharýashylyǵy kooperativterin damytyp, «aýyl turǵyndarynyń tabysyn arttyrý» jobasy sátti júzege asqan bolatyn.
Túrkistandyq delegatsiia birneshe sharýa qojalyǵy men kopperativterin aralap, tájiribe almasty. Pilottyq jobanyń artyqshylyqtary men tiimdi tustaryn anyqtap, júzege asyrý joldary boiynsha keńes aldy.
Atalǵan joba Jambyl oblysynda iske asqan ýaqytta halyqtyń jumyspen qamtylýy ósip, jobaǵa qatysqan adamdardyń tabysy 2 esege artqan, ataýly áleýmettik kómek alýshylar sany 3 ese azaiyp, 11 aýyldaǵy kásipkerler sany 3 esege kóbeigen. Aýyl turǵyndarynyń tabysyn arttyrý tájiribesi óz tiimdiligin kórsetip, Memleket basshysy tarapynan qoldaý tapqan-etin.
2021 jyly Úkimet basshysymen Aýyl sharýashylyǵy ministrligine jobany basqa óńirlerde keńinen qoldaný úshin jol kartasyn ázirleý tapsyrylyp, jobany respýblika kóleminde júzege asyrý jumystary bastalýda.
Atalǵan jobany Túrkistan oblysynda iske asyrý úshin 2023-2025 jyldarǵa respýblikalyq biýdjetten 20,5 mlrd. teńge qarjy baǵyttalýda. Bul qarjy joba qatysýshylaryna jyldyq 2,5% mólsherlememen qoljetimdi nesielendirý sharttary arqyly beriledi dep kózdelip otyr.
Kredit pen mikrokredit merzimi 5 jylǵa deiin. Al, mal sharýashylyǵy, aýyl sharýashylyǵy kooperativterin qurý salasyndaǵy jobalar úshin – 7 jylǵa deiin. Nesie somasy 2,5 myń AEK. Qazirgi tańda oblysta pilottyq jobaǵa qatysatyn ár aýdannan bir aýyldyq okrýg tańdalyp, alǵashqy 16 aýyldyq okrýg anyqtaldy. Ondaǵy halyq sany 185 436 adamdy quraidy.
Nesielendirýdi et, sút, jemis-kókónis óńdeý, balyq ósirý jáne teri, jún óńdeý baǵyttary boiynsha júzege asyrý kózdelýde. Nesielendirý jumystaryna senim bildirilgen agent retinde «Túrkistan» ÁKK» AQ anyqtaldy.
