Úkimet basshysy Asqar Mamin Túrkistan oblysyn áleýmettik-ekonomikalyq damytýdyń 2021-2025 jyldarǵa arnalǵan keshendi jospary halyqtyń turmys sapasy men ál-aýqatyn arttyrýǵa múmkindik beretinin atady, dep habarlaidy "Ult aqparat".
«Halyq sýmen jabdyqtaý qyzmetterimen 100%, gazben jabdyqtaý qyzmetterimen 85,4% qamtamasyz etiletin bolady. AÓK salasynda bes jyl ishinde 100-ge jýyq jobany iske asyrý josparlanyp otyr, bul jalpy ónim kólemin 729 mlrd-tan 1,3 trln teńgege deiin arttyrýǵa jáne eńbek ónimdiligin 2,5 esege arttyrýǵa múmkindik beredi. Bes jyl ishinde 5 mln sharshy metrge jýyq turǵyn úi, 130 jańa mektep, 10 densaýlyq saqtaý nysanyn, rýhani-mádeni ortalyq jáne basqa da áleýmettik sala nysandaryn salý josparlanǵan», - dedi Premer-Ministr Úkimet otyrysynda.
Asqar Mamin Túrkistan, Shymkent jáne Tashkent qalalaryn bailanystyratyn júrdek temirjol magistralin tartý, Túrkistan qalasynda jańa temirjol men avtobeketter salý josparynyń keleshegi zor ekenin aitty.
«Atalǵan sharalar jalpy óńirde ónerkásip kólemin 35%-ǵa, eńbek ónimdiligin 52%-ǵa arttyrýǵa jol ashady. Týrister aǵyny jylyna 1,2 mln-nan 2,5 mln adamǵa deiin artady. Keminde 40 myń jańa jumys orny qurylady. «Keshendi jospardy iske asyrýdyń 5 jyly ishinde 3,6 trln teńgege 142 is-shara oryndalady. Túrkistan oblysynyń ekonomikasy 5 jylda 1,5 ese ósedi», — degen Úkimet basshysy keshendi jospardyń ýaqytyly ári sapaly oryndalýyn tapsyrdy.
