Túrkistan oblysyna QR Aqparat jáne qoǵamdyq damý vitse-ministri Bolat Tilepov jumys saparymen keldi. Vitse-ministr sapary barysynda Qoja Ahmet Iasaýi kesenesine ziiarat etip, sol mańdaǵy etnoaýyl men botanikalyq baqty aralap kórdi, dep habarlaidy "Ult aqparat".
Sharaǵa Túrkistan oblystyq mádeniet basqarmasynyń basshysy Ázimhan Qoilybaev, oblystyq qoǵamdyq damý basqarmasynyń basshysy Damir Júnisov jáne BAQ ókilderi qatysty. Bolat Tilepov «Uly dala eli» ortalyǵynda «Ulylardan qalǵan mura» atty is-sharaǵa qatysyp, óziniń jeke muraǵatynda saqtalyp kelgen qazaq hany Abylaidyń Resei patshaiymy Ekaterina Alekseevnaǵa jazǵan hatynyń tupnusqasyn ortalyq basshylyǵyna saltanatty túrde tabys etti. Jiynda sóz alǵan Bolat Anapiiauly rýhani astanamyzdyń kún sanap kórkeiip, jandanyp, qaita túlep kele jatqany Elbasymyzdyń osydan úsh jyl burynǵy qabyldaǵan tarihi sheshiminiń jemisi ekenin tilge tiek etti.
«Kóne Túrkistan shahary nebári úsh jyldyń aralyǵynda adam tańǵalarlyqtai ásem de, kórki kóz tartar shaharǵa ainaldy. Taiaýda ǵana Túrkistan – Túrki elderiniń mádeni astanasy atanyp, Qazaq eliniń naǵyz mádeni, rýhani ortalyǵy ekenin barsha jurtqa pash ete bastady. Sońǵy eki jylda qalada 200-den astam mádeni, rýhani, áleýmettik nysandar boi kótirip keledi. Osy rette men de búkil qazaq halqynyń tereń tarihynan syr sherter jádigerlerdiń altyn uiasyna ainalyp otyrǵan «Uly dala eli» ortalyǵyna jeke muraǵatymda saqtalyp kelgen Abylai hannyń orys patshaiymy Ekaterina Alekseevnaǵa jazǵan hatyn tapsyrýdy jón kórdim», – dedi Bolat Anapiiauly.
Aita keteiik, «Uly dala eli» ortalyǵy Nursultan Nazarbaevtyń ótken jyly Túrkistan qalasyna sapary barysynda ashylǵan bolatyn. Ortalyqtyń negizgi maqsaty – Elbasymyzdyń «Uly dalanyń jeti qyry» baǵdarlamalyq maqalasynda atap ótilgen tarihi qundylyqtardy nasihattaý. Ortalyq Qazaq handyǵynyń qurylǵanynan bastap, jańa dáýir damýyna deiingi ártúrli taqyrypty ashatyn 9 tarihi-zamanaýi zaldan turady. Birinshi qabatta Túrkistan qalasy túrki halqynyń rýhani astanasy bolǵandyqtan túbi bir túrki halyqtarynyń baǵa jetpes qundylyǵy, Kúltegin eskertkishiniń úshinshi kóshirmesi qoiylǵan.
Kóne jádigerlerdi aralap kórgen vitse-ministr ortalyq qyzmetkerleriniń jumysyna shyǵarmashylyq tabys tiledi. Sondai-aq, ol «Kerýen sarai» keshenin, Tuńǵysh Prezident saiabaǵyn, «Altyn Samuryq» teatryn, fýdkor aimaǵyn aralap kórdi.
