Túrkistandaǵy Halyqaralyq týrizm jáne meimandostyq ýniversiteti stýdentterdi qabyldaýǵa daiyn emes. Bul týraly QR Premer-Ministri Asqar Maminge depýtattyq saýal joldaǵan senator Álimjan Qurtaev aitty, dep habarlaidy "Ult aqparat".
«Biyl QR Tuńǵysh Prezidenti - Elbasy Nursultan Ábishuly Nazarbaevtyń bastamasymen jáne Memleket basshysy Qasym-Jomart Toqaevtyń tapsyrmasy negizinde Túrkistan qalasynda Halyqaralyq týrizm jáne meimandostyq ýniversiteti ashyldy. Jańa ýniversitet Qazaqstan Respýblikasynda týristik qyzmetti damytýdyń memlekettik baǵdarlamasy aiasynda quryldy. Túrkistan qalasy - tegi bir, tarihy ortaq túrki elderiniń túp qazyǵy. Búginde Túrkistan isi musylman elderi úshin ǵana emes, dúniejúzi halqy úshin de qadirli mekenge ainalǵan. Jyl saiyn álemniń túkpir-túkpirinen 1 mln astam adam keledi, 2025 jyly Túrkistan óńirine 5 mln jýyq týrist keledi dep josparlanýda. Týrizmdi damytyp, saiahatshylarǵa sapaly qyzmet kórsetý maqsatynda, Týrizm jáne qonaqjailylyq salasyndaǵy mamandardy daiarlaý úshin Qazaqstandaǵy halyqaralyq deńgeidegi alǵashqy mamandandyrylǵan ýniversitetti ashýdyń mańyzyn atap ótken jón», - dedi senator.
Onyń aitýynsha, ýniversitet túlekteri halyqaralyq standarttyń qos diplomyn - qazaqstandyq jáne sheteldik seriktes ýniversitetten alady.
«Túrkistan qalasyndaǵy jańa Halyqaralyq týrizm ýniversiteti biyldan bastap talapkerlerdi qabyldady. 2020-2021 jylǵy oqý jylyna 800 grant bólingen. Alǵashqy 588 stýdent 6 bilim baǵdarlamasy boiynsha oqýdy bastady. Koronavirýs pandemiiasy is júzinde úlken janjaldan qutqardy deýge bolady. Sebebi atalǵan stýdentter onlain rejimde oqyp jatyr. Bizdi tań qaldyrǵan jaǵdai - osy ýaqytqa deiin atalǵan ýniversitet ǵimarattaryn jabdyqtaýǵa biýdjet qarajatyn bólý máselesi sheshilmegendigi bolyp otyr», - dedi ol.
Senator dereginshe, Túrkistan oblysynyń ákimdigi 4 ǵimarat bólgen. Onyń ekeýi - jańa bolsa, ekeýi - jóndeýden ótken burynǵy ǵimarattar. Búgingi tańda ǵimarattar qańyrap bos tur.
«Bilim ministrliginiń boljamyna sáikes, kelesi oqý kezeńinde stýdentter oqý ornyna baryp, dástúrli formatta oqidy. Biraq Halyqaralyq týrizm jáne meimandostyq ýniversiteti stýdentteri bul jaǵdaida qalai oqymaq?», - degen Álimjan Qurtaev Úkimet basshysynan osy máseleni sheshý úshin qarajat bólýdi surady.
