Túrkistandaǵy 17 tarihi-mádeni nysandy qaita jańǵyrtý jumystaryna sheteldik ǵalymdar da tartylýda. Bul týraly elimizdiń Mádeniet jáne sport ministrliginiń departament basshysy Kúmis Seiitova málim etti, dep habarlaidy "Ult aqparat".
Mádeniet jáne óner isteri departamenti basshysynyń aitýynsha, aǵymdaǵy jyly elimizdegi 240 respýblikalyq jáne halyqaralyq deńgeidegi eskertkishtiń 47-sinde jańartý jumystary júrgizilip jatyr. Sonyń ishinde Túrkistan qalasynda 17 tarihi-mádeni nysanda qaita jańǵyrtý jáne arheologiialyq jumystar qolǵa alynǵan. Bul jumystardy atqarý úsh jylǵa josparlanyp, 2019-2021 jyldarǵa bólingen.
«Qoja Ahmet Iasaýi keseneniń kúmbezinde, Rábiia Sultan begim men segiz qyrly kesenelerde, shyǵys monshasy siiaqty birqatar nysandarda qaita jańǵyrtý jumystary júrgizilýde. Sondai-aq, han ordasy men han meshiti ornalasqan Jeti ata qaqpasy men keseneni jalǵaityn magistraldy kóshede jáne Kúltóbe qalashyǵynda arheologiialyq qazba jumystary júrip jatyr. Bul jumystarǵa qarjy tek memlekettiń biýdjetinen ǵana emes, demeýshiler esebinen de qarastyrylyp otyr. Máselen, Kúltóbe qalashyǵynda demeýshilerdiń qoldaý kórsetýimen 9 ga jerde qazba júrgizilse, biyl sol jerden tabylǵan eskertkishterdi saqtap qalý men qorǵaý iaǵni konservatsiialaý, restavratsiialaý qolǵa alyndy. Qalpyna keltirý jumystaryna Qazaqstannan ǵana emes, sheteldik ǵalymdar da tartylýda. Keseneni búldirip almai saqtap qalý úshin ár jumysty ǵylymi-ádistemelik keńestiń aldyna qoiamyz jáne ǵalymdarmen de keńesip otyramyz», - dedi Kúmis Seiitova.
Aita keteiik, biyl Túrkistan oblysyndaǵy taǵy bir úlken jańalyq 88 ga aýmaqqa abattandyrý jumystary júrgizilip jatqany bolyp otyr. Bul jumystardy ázirge Túrkistan qalasy ákimdigi atqarýda.
