Túrkistan oblysynda 2022-2023 jyldardaǵy jylý berý maýsymy shtattyq rejimde ótip jatyr. 17 aýdan, qalanyń 14-inde jylý maýsymy bastaldy, al Maqtaral, Jetisai, Ordabasy aýdandarynda 1 qarashada bastalady. Osy saladaǵy máseleler oblys ákiminiń aptalyq apparat otyrysynda talqylandy. Oblys ákimi Darhan Satybaldy áleýmettik nysandar men turǵyn úilerdiń bári talapqa sai jylýmen qamtylýy kerek ekenin jetkizdi. Birqatar máselege toqtalyp, kemshilikke jol bergen basshylarǵa jumysty shiratýdy tapsyrdy.
Túrkistan qalasyndaǵy 73 kópqabatty, 52 jeke turǵyn úiler, 28 biýdjettik mekeme, 55 kásipkerlik nysandar ortalyq qazandyqpen qamtylǵan. Otyn túri – tabiǵi gaz.
«Kóterilip otyrǵan másele mańyzdy. Sondyqtan asa mán berip, jaýapkershilikpen qaraýdy tapsyramyn. Ákimshilik iskerlik ortalyqta jańadan qurylysy júrgizilgen 10 kópqabatty turǵyn úige (780 páterli) jylýmen qamtityn qazandyqtyń atqarýshy tehnikalyq qujattamasy ótkizilmegen, jylý qubyrlaryn daiyndaý qajet. Búgingi tańda aýa raiy ózgerip, kún sýytýda, aldymyzda qys kele jatyr. Osyǵan bailanysty atalǵan kemshilikterdi shuǵyl túrde qalpyna keltirip, jylytý maýsymynda halyqty túgeldei jylýmen qamtamasyz etýdi tapsyramyn», – dedi D.Satybaldy.
Túrkistan oblysynyń energetika jáne turǵyn úi-kommýnaldyq sharýashylyq basqarmasynyń basshysy Sáken Dalievtiń aitýynsha, Túrkistan qalasyndaǵy 73 kópqabatty, 52 jeke turǵyn úi, 28 biýdjettik mekeme, 55 kásipkerlik nysan ornalasqan qýaty 40Gkal/saǵ quraityn ortalyq qazandyqtan qamtylýda. Oblys boiynsha ortalyqtandyrylǵan jylýmen qamtamasyz etiletin 626 kópqabatty turǵyn úidiń 626-i, iaǵni, 100% jylytý maýsymyna daiyndalǵan.
Oblys ákimi aýdan, qala ákimderine, basqarma basshysyna jylý máselesin baqylaýda ustap, júieli jumys júrgizýdi tapsyrdy. Kentaýdaǵy jylý qubyrlaryn daiarlaý, aýdandarǵa qajetti kómirdi ýaqtyly jetkizý jóninde tapsyrmalar berdi.
