Foto: NUR.KZ/Vladimir Tretiakov
Túrkistanda meditsinalyq kómek kórsetýge barǵan feldsher soqqyǵa jyǵyldy, dep habarlaidy Ult.kz KTK arnasyna silteme jasap.
Túsik tastaý qaýpimen shaqyrtqan kelinshekti kórýge barǵan 26 jastaǵy Qudyret Mútálipovti patsienttiń kúieýi uryp tastaǵan. Aýyr soqqy alǵan jedel járdem qyzmetkeri miy shaiqalyp, qazir aýrýhanada jatyr. Janjaldyń neden shyqqanyn KTK tilshisi bilip qaitty.
Jedel járdem feldsheri Qudiret Mútálipovke kezekti shaqyrtý júkti kelinshekten túsedi. Janyna praktikant qyzdy ertken feldsher soqyr ishekten kúdiktenip, aiaǵy aýyr kelinshektiń ishin ustap tekseredi. Biraq munysy janynda turǵan kúieýine unamapty. Kelinshegine bóten erkektiń qoly tigenine shamdanǵan azamat meditsina qyzmetkerin, ái-shái joq, sabap tastaǵan.
Janel Qýanyshbek, praktikant:
"Aldymen betinen judyryqpen urdy, oń jaq betinen urdy. Urǵan kezde basy qabyrǵaǵa soǵylyp, otyryp qaldy. Aiaǵymen bar kúshimen betinen tepti. Meń-zeń boldy. Keiin aiaǵymen úshinshi ret tepti. Sol kezde iyǵyna tidi. Iyǵyna tigennen keiin, anasy artynan qushaqtap ajyratyp aldy".
Kómektesem dep baryp, taiaq jep ketken feldsherge jedel járdem shaqyrtylyp, ol aýrýhanadan bir-aq shyqty. Basynan aýyr jaraqat alyp travmatologiia bóliminde jatqan 26 jastaǵy jigit ýaqytsha esin joǵaltypty. «Keshegi kún múldem esimde joq» degen ol, sóileýge de qulyqsyz. Dárigerler Qudiret Mútálipov ózine kelý úshin áli eki aptadai emdelýi kerek dep otyr.
Bekzat Berdenov, Túrkistan ortalyq aýrýhanasynyń bas dárigeri:
"Tiisti diagnostika zertteýi júrgizilip, jabyq bas jaraqaty, miynyń shaiqalýy, kóziniń jumsaq tinderi zaqymdanǵan, gematoma diagnozymen travmatologiia bólimshesine jatqyzyldy. Qazir naýqastyń densaýlyǵy ortasha aýyr. Tiisti mamandardyń keńesi taǵaiyndaldy".
Qyzmetkeri soqqyǵa jyǵylǵan Túrkistan oblystyq jedel járdem stansasy basshylyǵy feldsher aiaǵynan tik turyp ketkenshe, jumys orny saqtalady deidi. Sondai-aq olardyń aitýynsha, judyryǵy jýan sotqar men jábirlenýshiniń týystary ózara kelisimge kelip, keshirim berdi dep otyr.
Nurmuhan Abdýlla, Túrkistan oblysy jedel járdem stantsiiasynyń zańgeri:
"Bizdiń qyzmetker keshirim bergen. Qos tarap sóilesip, ol kisige keshirim bergen. Eshqandai aryz berilmegen. Politsiia qyzmeti shaqyrtý ala sala, negizi, tirkeý kerek. Bizden jedel járdem bardy. Biz eńbek inspektsiiasyna jazyp qoidyq, Aýrýhanadan anyqtamasyn alamyz, densaýlyǵy jaiynda, ony da eńbek inspektsiiasyna joldaimyz".
Keshe bolǵan oqys oqiǵa jaily Túrkistan oblysy politsiia departamenti eshqandai túsinikteme bere almaidy. Jýan judyryqty turǵyn týraly da aqparat joq. Em kórsetem dep soqqyǵa jyǵylǵan feldsher ázirshe Túrkistan aýrýhanasynda emdeledi. Túsinikteme alý úshin ázirge politseiler munda da bas suqqan joq.
