Ońtústik Qazaqstan oblysynyń ákimi Janseiit Túimebaevtyń jáne aýyl turǵyndarynyń qatysýymen, Túrkistan qalasy mańyndaǵy Úshqaiyq aýyldyq okrýginde jańa «Qarashyq» shaǵyn sý qoimasy paidalanýǵa berildi, dep habarlaidy "Ult aqparat".
Sý qoima jalpy qory 2 mln. m3 sýdy saqtaýǵa qaýqarly. Sý qoimasy endi 350 gektar aýmaqty sýǵarýǵa tikelei septigin tigizedi. Ashylý saltanatyna qatysqan oblys ákimi óńirde mundai sý qoimalardyń sany bolashaqta artatynyn jetkizdi.
«Ońtústik Qazaqstan oblysynda keleshekte 30-ǵa jýyq sý qoimanyń qurylysy bastalady. Nátijesinde sýdy tiimdi paidalanyp, ony saqtap sýarmaly jerlerge jumsaýǵa bolady. Osylaisha oblysta egistiktiń kólemi artyp, jergilikti jurtty jumyspen qamtýǵa múmkindik týady. Eń bastysy aýyl sharýashylyǵyn damytýǵa erekshe ekpin beredi», - dedi Janseiit Qanseiituly.
Aita keterligi, «Qarashyq» shaǵyn sý qoimasynyń qurylysyn «SMK i J-7» JShS-i júrgizgen. Qurylys nysanyn salýǵa 471,4 mln teńge jumsalypty. Búginde sý qoima el igiline berilip otyr. Aldaǵy ýaqytta Úshqaiyq aýyldyq okrýginde júgeri, jońyshqa, baqsha daqyldary egiletin bolady.
