Túrkistan qalasyndaǵy Shyǵys monshasy, Vizit ortalyq, Jeńis saiabaǵy sekildi jańadan salynǵan ǵimarattar satylyp jatyr degen aqparat shyndyqqa janaspaidy. Bul týraly qala ákimi Nurbol Turashbekov málimdedi, dep habarlaidy QazAqparat.
Áleýmettik jelide Túrkistan qalasyndaǵy ǵimarattardyń satylyp jatqandyǵy týraly aqparat taraǵan bolatyn. Qala ákiminiń aitýynsha, olar satylǵan joq, senimgerlik basqarýǵa berilgen.
«Áleýmettik jelide de, halyqtyń arasynda da bul jaǵdai úlken rezonans týdyrdy. Muny durys túsiný kerek. Senimgerlik basqarý degenimiz - jekemenshikke berý emes. Kelisimshartqa orai, nysandy senimgerlik basqarýǵa alǵan kásipker kútip ustaý jumystaryn júrgizedi. Oǵan biýdjetten qarjy jumsalmaidy», - dedi Nurbol Turashbekov.
Sondai-aq, qala ákimi aldaǵy ýaqytta senimgerlik basqarýǵa alleialar men saiabaqtar da beriletindigin aitty.
«Memleket tarapynan salynyp jatqan ǵimarattardy kútip ustaý ońai sharýa emes. Máselen, «Jibek joly» saiabaǵyn senimgerlik basqarýǵa alǵan kásipker óz biznesin júrgizedi, ári halyqqa qyzmet kórsetedi. Eń bastysy, nysandy kútip ustaidy. Eger talaptardy oryndamasa, kelisimshartty birjaqty buzamyz», - dedi ákim.
