Túrkistanda jańadan salynyp jatqan nysandardyń qurylysy qarqyndy júrýde. Oblys ákiminiń tapsyrmasyna sáikes, halyq kóp shoǵyrlanǵan ortalyq kósheler boiynan qoǵamdyq kógaldardy (skverler men alleialar) kóbeitý boiynsha birneshe demalys alańshalary salynýda, dep habarlaidy "Ult aqparat".
Qaladaǵy burynǵy «Selmag» sý qoimasynyń ornynan boi kóteretin «Jastar alleiasy» qala jastarynyń demalysy úshin tiimdi ári qolaily oryn bolmaq. Munda sport alańdary (tennis korttary, voleibol, basketbol alańshalary) men demalys bastyrmalary, sýburqaqtar salynyp, abattandyrylady. Qazirgi tańda 3,3 gektar jerdi quraityn alleianyń aýmaǵy tegistelip, tazalaý jumystary júrgizildi.
Eski sý qoimasynyń qubyrlary aýystyrylyp, transheialar qazylýda. Sý burqaqtar qurylysy bastalyp, betondaý jumystary júrgizilip jatyr. Sondai-aq, demalys ornynyń aldynda arnaiy avtoturaq salynady dep josparlanǵan.
