Jýyrda Túrkistan qalasynda «Túrki áleminiń ortalyǵy» nysanynyń sáýlettik-kórkemdik kelbetin, keshendi sáýlet tujyrymdamasyn ázirleý úshin respýblikalyq ashyq baiqaý uiymdastyrylǵan bolatyn. Búginde osy mańyzdy jobany júzege asyrý joldary zerdelenip jatyr. Oblys ákimi Darhan Satybaldynyń tóraǵalyǵymen atalǵan ortalyqtyń tujyrymdamasyn ázirleý jóninde keńes ótti.
«Túrki áleminiń ortalyǵy» nysanynyń tujyrymdamasy tereń taldanyp jasalýy tiis. Túrki memleketterine arnalǵan bólimderi men murajailaryn ázirleýge sol elderdiń ókilderin shaqyrý máselesin qarastyrǵan jón. Elimiz úshin, Túrkistan úshin bul nysannyń ideologiialyq-rýhani máni zor. Bul ortalyq túrki elderiniń tarihyn ǵana dáriptep qana qoimai, týrizmdi damytýǵa úles qosady. Oǵan barlyq múmkindikti qarastyramyz. Aldymen oblystyq, keiin memlekettik deńgeide zerdelep, usynystardy engizemiz», – dedi Darhan Satybaldy.
Májiliste qurylys, sáýlet salasynyń ókilderi óz pikirleri men usynystaryn aitty. Túrkistan oblysynyń mádeniet basqarmasynyń basshysy Ázimhan Qoilybaev Túrkistan qalasyndaǵy «Túrki áleminiń ortalyǵy» nysanynyń ǵylymi tujyrymdamasy «Mádeniet týraly» Qazaqstan Respýblikasynyń 2006 jylǵy 15 jeltoqsandaǵy №207 Zańyna sáikes daiyndalatynyn aitty. 2021 jyly, 31 naýryzda «Túrkistan – túrki áleminiń rýhani astanasy» taqyrybynda túrkitildes memleketterdiń yntymaqtastyq keńesiniń beiresmi sammiti ótken bolatyn. Sammitte QR Prezidenti Qasym-Jomart Toqaev Túrkistan qalasynda túrki halyqtaryna ortaq sáýlet nysanyn salýdy tapsyrdy. Osy tapsyrma da negizge alynady.
Qazaqstan – kúlli túrki halyqtarynyń qasietti qara shańyraǵy. «Túrki álemi» ortalyǵy zamanaýi tehnologiialardy paidalana otyryp, turaqty ekspozitsiialar men ýaqytsha kórmeler qurý arqyly myńjyldyqtar túkpirindegi túrki álemi halyqtarynyń tarihy men mádenietin kórsetýge múmkindik beredi. Sonymen qatar mádeni, ádebi forýmdar men bilim berý baǵdarlamalaryn ótkizýge arnalǵan oryn bolýy tiis. Ortalyqtyń basty mindetteriniń biri – túrki áleminiń tarihi - mádeni murasyn nasihattaý, Túrkistan qalasyn túrki áleminiń rýhani astanasy retinde jáne halyqaralyq deńgeidegi mádeni jáne týristik ortalyq retinde nasihattaý. Týrister sanyn arttyrý da – nazarda. Osy derekterge toqtalǵan basqarma basshysy kóne túrki jazýy, Túrki áleminiń dańqty perzentterin de nasihattaý josparda ekenin jetkizip, osy baǵytta usynystar ázirlenip jatqanyn atap ótti.
