Túrkistanda «Túrki áleminiń ortalyǵy» nysanynyń sáýlettik-kórkemdik kelbetin, keshendi sáýlet tujyrymdamasyn ázirleý úshin respýblikalyq ashyq baiqaý uiymdastyryldy, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Baiqaýǵa elimizdiń túkpir-túkpirinen sáýletshiler qatysyp, 17 joba usynyldy. Oblys ákimi Darhan Satybaldy atalǵan arnaiy kórmege qoiylǵan jobalarmen tanysyp, sáýletshiler men músinshilermen kezdesti.
«Túrkistannyń árbir nysany talapqa sai bolýy tiis. «Túrki áleminiń ortalyǵy» ǵimaraty atyna sai bolyp, qurylys salasynyń sońǵy tehnologiialary qoldanylǵan jón. Oǵan ýaqyt ta, múmkindik te bar», – degen Darhan Satybaldy jobalardy jetildirý jóninde óz usynystaryn aitty.
Túrkistan oblysynyń sáýlet jáne qala qurylysy basqarmasy uiymdastyrǵan baiqaýdyń ekinshi kezeńine irikteýden ótken úzdik jobalar jiberiletin boldy.
2021 jyly, 31 naýryzda «Túrkistan – túrki áleminiń rýhani astanasy» taqyrybynda túrkitildes memleketterdiń yntymaqtastyq keńesiniń beiresmi sammiti ótken bolatyn. Sammitte QR Prezidenti Qasym-Jomart Toqaev Túrkistan qalasynda túrki halyqtaryna ortaq sáýlet nysanyn salýdy tapsyrdy. Osyǵan orai Túrkistan oblysynyń ákimdigi osy ashyq baiqaýdy uiymdastyryp otyr. Baiqaýǵa qatysýshylarǵa Túrkistannyń tarihi kelbetin saqtai otyryp, jańa nysannyń tujyrymdamasyn ázirleý talaby qoiylǵan. Túrki áleminiń ortalyǵy ǵimaraty túrki tildes elderdiń birligi men yntymaǵyn bildiretin rýhani ortalyqqa ainalýy tiis.
