Túrkistan – túrki áleminiń rýhani astanasy. Bul kóne shahardyń mártebesin Prezident Qasym-Jomart Toqaevtyń ózi anyqtap, resmi bekitip berdi. Túrkistannyń túrki áleminiń aldynda moiyndalýy – úlken jetistik. Bul týraly «Túrkistan» telearnasyna bergen suhbatynda Parlament Senatynyń depýtaty Áli Bektaev aitty.
Ol aimaqta sońǵy úsh-tórt jyldyń kóleminde atqarylyp jatqan jumystar qyrýar ekenin jetkizdi. Memleketimizdiń rýhani astanamyzdy qaita túletýge múmkindigi bolǵany – úlken maqtanysh. Muny áleýeti joǵary, ekonomikasy ilgerilegen memleket qana iske asyra alady.
«Biz táýelsizdik jyldarynda ekinshi astanamyzdy turǵyzdyq dep aitýǵa negiz bar. Túrkistandy búkil álem burynnan-aq tanyǵan, búkil qazaq burynnan táý etken onda baryp. Qazaqtyń qandai batyry, bii, sultany bolmasyn, ózderin Túrkistannyń qasietti topyraǵynda jerleýdi ósiet etken. Sol sebepten, Qoja Ahmet Iasaýi kesenesiniń mańy, ondaǵy qorǵalǵan tóńirekte zertteýdi qajet etetin jádigerler óte kóp. Al Qoja Ahmet Iasaýidiń dańqy bárimizge málim, on tórtinshi, on besinshi ǵasyrlardaǵy Orta Aziiadan shyqqan ǵulamalardyń biri. Onyń ilimi, tálimi áli kúnge mańyzyn joiǵan joq, kóptegen shákirtteri bar. Qazaqstandy atajurty sanaityn túrkiialyqtar sol kesenege kelip táý etedi», – dedi halyq qalaýlysy.
Depýtat aimaqtyń týrizmi sońǵy kezderi airyqsha damyp jatqanyn atap ótti. Týristerdiń sany byltyrǵymen salystyrǵanda eki ese ósken. Osydan birneshe jyl buryn ǵana Túrkistanǵa saparlaityndar 800 myńnyń ainalasynda edi. Al qazir 2 millionnyń ústinde degen derekter bar.
«Jalpy, Qazaqstanda týrizmdi budan da órkendetemiz desek, áli de júieli jumystardy atqarý kerek. Óitkeni, bizde sheteldikterge kórsetýge laiyqty oryndar óte kóp. Solardyń biregeii – Túrkistan. Onda dini, rýhani, ekonomikalyq baǵytta ilkimdi isterdi qolǵa alýǵa bolady. Ol úshin eýropalyq stildegi ǵimarattardy salyp qoiý azdyq etedi. Eń aldymen, keseneniń mańyndaǵy, qorǵaý aýmaǵyndaǵy jádigerlerdi tolyqtai shyǵaryp, zertteý kerek. Óitkeni, halyq ta, týrister de on ekinshi ǵasyrdaǵy, odan bergi ýaqyttaǵy Iassy shaharyn kórgisi keledi», – dedi Áli Bektaev.
Onyń paiymynsha, týristerdiń deni tarihqa qyzyǵady, shynaiy tarihty kórgisi keledi. Áitpese, demalý, saýda-sattyq jasaý qazirgi týristerge tańsyq emes.
