Jezqazǵanda káriz qudyǵyn tazalaý kezinde bolǵan qaiǵyly oqiǵa bir adamnyń ómirin jalmady. Taǵy bir kommýnaldyq qyzmetker aýyr hálde aýrýhanaǵa jetkizildi, dep habarlaidy ult.kz.
Oqiǵa Abai men Chehov kósheleriniń qiylysynda bolǵan. Aldyn ala málimet boiynsha, «Jylý-sý sharýashylyǵy kásiporny» AQ-nyń qyzmetkerleri káriz júiesin tazalaý jumystaryn júrgizip jatqan kezde qudyq ishinde qaýipti gaz taralǵan.
Saldarynan 1982 jyly týǵan jumysshy oqiǵa ornynda kóz jumdy. Al 1986 jyly týǵan ekinshi qyzmetker es-tússiz kúide aýrýhanaǵa jetkizilip, jansaqtaý bólimine jatqyzylǵan.
Dárigerlerdiń aitýynsha, zardap shekken azamat aýrýhanaǵa tynys alý jetkiliksizdigi belgilerimen óte aýyr jaǵdaida túsken. Keiin qajetti meditsinalyq kómekten soń jaǵdaiy birshama turaqtanyp, profildik bólimge aýystyrylǵan.
Kýágerlerdiń sózinshe, jumysshylar belgisiz ýly zattyń, boljam boiynsha metan gazynyń áserine ushyraǵan. Jabyq keńistikte gazdyń jinalýy adam ómirine asa qaýipti bolǵan.
Ulytaý oblysy ákimdigi oqiǵaǵa bailanysty resmi málimdeme jasap, atalǵan derek boiynsha Qylmystyq kodekstiń 156-baby 3-bóligimen is qozǵalǵanyn habarlady. Qazir eńbek qaýipsizdigi talaptarynyń saqtalýy men qaiǵyly jaǵdaidyń naqty sebepteri tekserilip jatyr.
Bul oqiǵa óndiristik qaýipsizdik máselesin taǵy da kún tártibine shyǵardy. Mamandar jabyq keńistikte jumys isteý kezinde qaýipsizdik talaptaryn kúsheitý qajettigin aityp otyr.
