Túrkistan oblysynda bes jasar qyz qańǵybas ittiń shabýylynan aýyr jaraqat alyp, jansaqtaý bólimine tústi. Oqiǵa Saýran aýdanyna qarasty Eski Iqan aýylynda bolǵan, dep habarlaidy ult.kz.
Otyrar.kz arnasynyń habarlaýynsha, búldirshin kúndiz aýyl balalarymen birge syrtta oinap júrgen kezde it tap bergen. Qansyraǵan bala shuǵyl túrde aýrýhanaǵa jetkizilip, dárigerler dereý ota jasaǵan.
Aq halattylardyń málimetinshe, it qyzdyń bet tusynan qatty qapqan. Dárigerler balanyń ómirine qaýip joq ekenin aitqanymen, betinde tyrtyq qalýy múmkin ekenin eskertti. Sonymen qatar, shabýyl kezinde qulap qalǵan búldirshin basynan da jaraqat alǵan.
Qazir qyzdyń jaǵdaiy turaqty, qajetti em qabyldap jatyr.
Jergilikti turǵyndardyń sózinshe, aýylda qańǵybas it máselesi burynnan ózekti. Turǵyndar mundai jaǵdaidyń alǵash ret bolyp turmaǵanyn aityp, qaýipsizdik sharalaryn kúsheitýdi talap etýde.
Saýran aýdandyq ákimdigi shabýyl jasaǵan itti anyqtaý jumystary júrip jatqanyn habarlady. Bir it ustalyp, zerthanaǵa jiberilgen. Al politsiia janýardyń iesin anyqtaýǵa kirisken.
Resmi málimetke sáikes, aýdanda biyl qańǵybas itterdi aýlaý jumystaryna 6,5 million teńge bólingen. Jyl basynan beri 50-ge jýyq it ustalǵan.
