Almatyda bloger qaza tapqan plastikalyq hirýrgiia klinikasyn densaýlyq saqtaý ministrligi teksere bastady. 53 jastaǵy Sáýle Bazarhan liposaktsiia jasatýǵa óz aiaǵymen baryp, ortalyqtan máiiti shyqqan. Marqumnyń týystary ólimniń naqty sebebin bile almai dal. Olar KTK telearnasyna suhbat berip, mán-jaidy baiandady, dep habarlaidy ult.kz.
Marqum Sáýle Bazarhan oqiǵa bolar kúni jumysynan eki saǵatqa suranyp shyǵypty. Ortalyqqa týysymen birge barǵan. Biraq bir jarym saǵatqa josparlanǵan ota ýaqytynda bitpegen. Tek arada úsh saǵat ótkende klinikadaǵylar jedel járdem shaqyrtady. Qaraly habardy týystaryna solar jetkizipti.
"4-ten 3 minýt ketkende alyp ketti, ishke qarai dedi. Maǵan "kútińiz" dep aitty. "Operatsiia qansha bolady?" degende, bir jarym saǵattai bolady dep aitypty. Bir jarym saǵat boldy ǵoi, saǵat bes jarym boldy ǵoi, shyǵatyn ýaqyty boldy ǵoi degen. Eshteńe aitpaidy. Dárigerler kiredi, shyǵady. Júgirip júr deidi. Sony tolyq aitpady deidi. Jedel járdem kelip, ol da kirip ketti de, qaitadan shyǵyp, qaityp ketti dedi", - deidi marqumnyń aǵasy Bolathan Ermahanov.
53 jastaǵy Sáýle ómirge qushtar edi, deidi jaqyndary. Júzýdi jany súigen marqum stomatologiia salasynda jumys istegen. Bir millionnan asa oqyrmany bar bloger áleýmettik jelidegi paraqshasyn júieli júrgizip otyrypty. Marqumnyń artynda eki balasy qaldy. Qara jamylǵan jaqyndary mán-jaidy anyqtap, kináli adamdardy tiisti jazaǵa tartýdy talap etedi. Qazir áieldiń ólimi boiynsha qylmystyq is qozǵalǵan.
"Atalǵan derek boiynsha Bostandyq aýdandyq politsiia basqarmasy qylmystyq is qozǵady. Qazir sotqa deiingi tergep-tekserý aiasynda tergeý áreketteri júrgizilýde. Onyń qorytyndysy boiynsha túpkilikti protsessýaldyq sheshim qabyldanady. QR QPK 201-babynyń talaptaryna sáikes, sotqa deiingi tergep-tekserýdiń ózge málimeti jariia etilmeidi", - deidi Almaty qalasy politsiia departamentiniń resmi ókili Saltanat Ázirbek.
Al qaiǵyly jaǵdai bolǵan klinika búgin paraqshasynda resmi jaýap jariialady. Dárigerlik qupiia men naýqastyń otbasyna qurmetti alǵa tartyp, resmi sharalar aiaqtalǵanǵa deiin jariia túrde pikir bildirmeitinin jazdy.
Qazir densaýlyq saqtaý ministrligi jaǵdaidy baqylaýǵa aldy. Klinikanyń litsenziiasy bar ma, ondaǵy mamandardyń biliktiligi jetkilikti me, kórsetiletin qyzmetter standarttarǵa sáikes júrgizile me, osynyń bári jiti tekserile bastady. Sondai-aq blogerdiń qazasynan soń, kosmetologiialyq qyzmet kórsetetin ózge de uiymdarǵa monitoring kúsheitilmek.
