Qytailyq investorlar Prezident Qasym-Jomart Toqaevtan óz quqyqtary men múddelerin qorǵaýdy surap otyr. Olar Shymkenttegi «Sin Iýan Stil» JShS aýmaǵynda bolǵan politsiia áreketterinen keiin kásiporyn jumysy toqtap, iri investitsiialyq joba qaýipke ushyraǵanyn málimdedi. Kásipkerler qala ákimdigin kásiporyn jumysyna kedergi keltirdi dep kúdiktenýde, dep habarlaidy ult.kz vera.kz saityna silteme jasap.
Kásipkerlerdiń aitýynsha, 6 mamyr kúni Shymkent qalalyq politsiia departamentiniń UBOP qyzmetkerleri zaýyt aýmaǵyna kirip, Qytaidyń 80 azamatyn ustaǵan. Sonyń saldarynan óndiris ýaqytsha toqtap, indýktsiialyq peshter, gaz qondyrǵylary men óndiristik jeliler baqylaýsyz qalǵan. Zaýyt ieleri munyń kásiporynǵa aitarlyqtai shyǵyn keltirgenin aitady.
Politsiia departamenti tekserý «102» arnasyna túsken habarlama negizinde júrgizilgenin málimdedi. Aqparatta shetel azamaty zańsyz ustalyp otyr delingenimen, bul derek rastalmaǵan. Alaida tekserý barysynda Qazaqstanda zańdy túrde júrgenin rastaityn qujattary joq shetel azamattary anyqtalǵan.
«Qujattary bolmaǵan azamattar jeke basyn anyqtaý úshin qabyldaý-taratý ornyna ornalastyryldy. Barlyq sharalar qoldanystaǵy kóshi-qon zańnamasyna sáikes júrgizildi», – dep habarlady Shymkent qalalyq politsiia departamentiniń baspasóz qyzmeti.
Zaýyt ieleriniń málimetinshe, ustalǵandardyń arasynda kásiporynǵa 30 mln dollar investitsiia salýdy josparlaǵan eki qytailyq investor da bolǵan. Olardyń biri Qazaqstanǵa vizasyz rejim arqyly kelgenin, alaida politsiia tólqujatyn alyp qoiǵanyn aitqan.
«Biz “Bir beldeý – bir jol” baǵdarlamasy aiasynda Qazaqstanǵa investitsiia salýǵa keldik. Biraq bolǵan jaǵdai basqa investorlarǵa da keri áser etýi múmkin», – dedi investorlardyń biri.
Taǵy bir kásipker Oon Chenniń aitýynsha, onyń S-5 investorlyq vizasy bolǵanyna qaramastan, birneshe kún arnaiy qabyldaý ornynda ustalyp, qujattary qaitarylmaǵan.
Kásipkerler bul oqiǵanyń ádeii uiymdastyrylǵan bolýy múmkin ekenin aityp, politsiia «úshinshi tulǵalardyń yqpalymen áreket etti» dep kúmán keltirýde. Olar tergeý júrgizip, zaýyt jumysynyń ýaqytsha toqtaýyna kináli tulǵalardy anyqtaýdy surady.
Al politsiia ókilderi barlyq jedel is-sharalar zań aiasynda ótkenin jáne investorlardyń qamaýǵa alynǵany týraly aqparat shyndyqqa sáikes kelmeitinin málimdedi. Qazirgi ýaqytta ustalǵan qyzmetkerler bosatylǵanymen, zaýyt ieleri kei azamattardyń qujattary áli tolyq qaitarylmaǵanyn aitady.
