Aqtaýda 49 jastaǵy máslihat depýtaty Erbol Aitýov iek astyndaǵy maidy aldyrý úshin “Qasiet” klinikasyna júgingen. 4 sáýir kúni narkoz salý kezinde onyń jaǵdaiy kúrt nasharlaǵan, dep habarlaidy ult.kz.
Marqumnyń jubaiynyń aitýynsha, intýbatsiia durys jasalmaǵandyqtan er adamnyń qan qysymy men qandaǵy qant deńgeii kúrt kóterilip, ishemiialyq insýlt alǵan. Keiin komaǵa túsip, arada bir ai ótkende qaitys bolǵan. Týystary klinika kómekti der kezinde kórsetpedi ári naýqastyń naqty jaǵdaiyn jasyrdy dep otyr.
Densaýlyq saqtaý ministrliginiń tekserisi kezinde klinikadan birqatar zańbuzýshylyq anyqtalǵan. Atap aitqanda, operatsiia blogy tolyq jabdyqtalmaǵan, kei qurylǵylardyń paidalaný merzimi ótip ketken. Al anafilaktikalyq shokqa qarsy qajet quraldar bolmaǵan.
Sonymen qatar klinikada eresekterge arnalǵan anesteziologiia jáne reanimatsiia qyzmetine litsenziia bolmaǵany belgili boldy. Tekserý barysynda naýqastyń tolyq tekserilmei, qarsy kórsetilimderge qaramastan operatsiiaǵa jiberilgeni de anyqtalǵan.
Tekserý materialdary prokýratýraǵa joldandy.
Erbol Aitýov Mańǵystaý oblystyq máslihatynyń depýtaty bolǵan. Sonymen qatar 2023 jyldan beri Mańǵystaý oblysy kásipkerler palatasynyń óńdeý ónerkásibi jáne bazalyq salalar komitetin basqarǵan.
