Túrkistan oblysyndaǵy Qarataý qoinaýy tarihi oryndar men mádeni oshaqtarǵa bai. Qarataýdyń baýraiyndaǵy Saýran, Sozaq aýdandarynda ornalasqan tarihi-mádeni esketkishterdi qorǵaý, sakraldy mekender men qorymdardy qamqorlyqqa alý kún tártibindegi ózekti máselelerdiń biri. Osy maqsatta Sozaq aýdanynda «AMANAT» partiiasynyń Túrkistan oblysy boiynsha sailaýaldy baǵdarlamasyn oryndaý jónindegi Jol kartasyna sáikes «Miras» azamattyq qoǵam men mádenietti damytý jónindegi Qoǵamdyq keńestiń kóshpeli otyrysy ótti.
Basqosýdy atalǵan keńestiń tóraiymy Qalyima Jantóreeva ashyp, júrgizdi. Jiynǵa Sozaq aýdany ákiminiń orynbasary Qaldybek Orazov, «Turkistan Media Holding» JShS-niń basqarýshy direktory Telman Beisen, keńes músheleri Seidýlla Aikózov, Jazira Isaeva, Gúljanat Dúisenbaeva qatysty. Keńes otyrysynda «Qyzqorǵan», «Balaqorǵan» tarihi oryndarynyń qazirgi jai-kúii men máseleleri, Sozaq aýdanyndaǵy mádeni oshaqtarynyń ahýaly aitylyp, mádeniet pen óner salasynda atqarylǵan sharalardyń esebi tyńdaldy.
«Qyzqorǵan» men «Balaqorǵan» eskertkishteri mańynan qurylys úshin taqta tastardy alýdy toqtatý – kezek kúttirmeitin problema. Áitpese, bul tarihi oryndar múlde joiylyp ketýi múmkin. Sol oryndarǵa keletin týristerge arnap jol belgilerin ornatyp, mobildi qosymshalardy engizý kerek. Bul ári óńir týrizmine de qosylar úles bolar edi. Sonymen qatar tarihi jádigerler týraly málimetter men qos aýdannyń ziialy qaýym ókilderiniń pikirin toptastyryp, jinaq etip shyǵarýdy da qolǵa alý qajet», – dedi ol.
Sozaq aýdany ákiminiń orynbasary Q.Orazovtyń baiandamasyna sáikes jiyn sońynda aýdan ákimdigi men mádeniet bólimine birqatar usynystar berildi. Atap aitqanda, aýmaqtaǵy qiraýǵa jaqyn jáne joiylýy múmkin arheologiialyq, sáýlet eskertkishterin qalpyna keltirý, olardy qorǵaý boiynsha mindetter júkteldi. Sondai-aq eldi mekenderdegi orta mektepterdiń úiirmeleriniń sabaqtaryn Mádeniet úilerinde ótkizýge yqpal jasaý máselesi de sóz boldy. Keńes tóraǵasy atalmysh tapsyrmalardyń oryndalýy men júzege asýy «Miras» qoǵamdyq keńesiniń baqylaýynda bolatynyn aityp, jiyndy qorytyndylady.
