Búgin Túrkistan qalasyndaǵy «Farab» kitaphanasynda qazaq ádebieti men baspasózine ólsheýsiz úles qosqan zańǵar jazýshy, qairatker tulǵa Sherhan Murtazanyń 90 jyldyǵyna arnalǵan «Kórkemsózdiń kóshbasshysy, kósemsózdiń qolbasshysy» atty halyqaralyq simpoziým ótti.
Keleli basqosýǵa respýblikamyzdyń óńirlerinen, Qyrǵyzstan, Ózbekstannan kelgen ǵalymdar, qalamgerler jáne Shymkent qalasy men Túrkistan, Jambyl oblystarynyń ziialy qaýym ókilderi qatysty.
Halyqaralyq simpoziýmǵa kelýshiler aldymen «Sherhan Murtaza-90» ekspozitsiiasyn tamashalady. Basqosýdyń ashylýynda sóz alǵan QR Prezidentiniń keńesshisi Málik Otarbaev Sherhan Murtazanyń jazýshylyq, jýrnalistik jáne qairatkerlik qyrlaryna keńirek toqtaldy.
«Sherhan Murtaza – qatardaǵy jazýshy, jýrnalist emes, qazaqtyń mańdaiyna bitken dara tulǵa. Óziniń ár maqalasymen, árbir áńgimesimen, povest, romandarymen halyqqa qaltqysyz qyzmet etti. Búgingi sharanyń Túrkistan tórinde ótip jatqandyǵy da beker emes. Ol túrkishildik rýhy óte biik tulǵa bolatyn. «Egemen Qazaqstan» gazetinde óziniń avtorlyǵymen jariialanǵan alǵashqy maqalalarynyń biri de osy qasterli Túrkistan tóńireginde edi. Mine, Táýelsizdik kúni qarsańynda kórnekti qalamgerdi Túrkistan oblysynda eske alyp otyrmyz. Táýelsizdik kúni – búkil Qazaq eliniń, onyń ishinde halyq jazýshysynyń da armany-tuǵyn. Sol úshin qalamyn qarý etip, el múddesi jolynda aianbai kúresti, sanaly ǵumyryn ult rýhaniiatynyń damýyna arnady», - dedi qalamgerdiń «Ai men Aisha» romanyn túrik tiline aýdarǵan Málik Nurjanuly.
Jiyn barysynda Túrkistan oblysy ákiminiń orynbasary Beisenbai Tájibaev jýrnalisterdiń birneshe býynyn tárbielegen Sheraǵanyń ulttyq baspasózdiń damýyna qosqan úlesin tilge tiek etip, oblys ákimi Darhan Satybaldynyń quttyqtaýyn jetkizdi.
«Aqiqattyń aldaspany Sherhan Murtaza Túrkistan óńirin túrki halyqtarynyń rýhani ortalyǵyna ainaldyrý jóninde alǵash bastama kótergenderdiń biri boldy. Qairatker qalamgerdiń kóptegen shyǵarmalaryna Ońtústiktiń tańǵajaiyp tabiǵaty arqaý bolǵanyn kópshilik biledi. Sondyqtan da biz Sheraǵany Túrkistannan, Túrkistandy Sheraǵadan bólip qarai almaimyz. Qalyń oqyrmannyń kóńilinen shyqqan jazýshynyń mereitoiyna arnalǵan sharalar bir kúnmen ǵana shektelmeidi. Bul baǵyttaǵy igi ister aldaǵy ýaqytta da jalǵasady», - dedi Beisenbai Dáýletuly.
Simpoziýmda belgili jýrnalist, pýblitsist, Qazaqstannyń eńbek sińirgen qairatkeri Qainar Oljai, respýblikalyq «Egemen Qazaqstan» gazeti bas redaktorynyń orynbasary Talǵat Batyrhan shyndyqtyń shyraqshysy atanǵan sóz zergeriniń elge sińgen eńbegin aityp, ónegeli ómirinen syr shertti.
«Biz Sheraǵańnyń shekpeninen ǵana shyqqan joqpyz, Sheraǵańnyń ýniversitetinen tálim aldyq. «Egemende» birge qyzmet etkende nartulǵanyń qalamynan týǵan «Qaita oralǵan qandastar» degen aidar boldy. Sol aidarmen birneshe maqala jariialandy, qiyrda júrgen qanshama aǵaiyn elge qut bolyp qosyldy. Túiip aitqanda, ardaqty Sheraǵańmen birge gazetke jańa lep keldi, ulttyq bolmys paida boldy. Ásirese, qazaqi boiaýy qanyq maqalalarǵa basymdyq berdi. Qalamgerdiń ereksheligi, ónegesi, mine, osynda», - dedi Qainar Oljai.
Sondai-aq jazýshy aýdarmashy, Álisher Naýai atyndaǵy Tashkent memlekettik Ózbek tili jáne ádebieti ýniversitetiniń ǵalymy Qazaqbai Iýldashev, Qyrǵyz Respýblikasy Ulttyq Ǵylymdar Akademiiasynyń Sh.Aitmatov atyndaǵy Til jáne ádebiet institýtynyń jetekshi ǵylymi qyzmetkeri, filologiia ǵylymdarynyń doktory Keldibek Qoilybaev júrekjardy lebizderin jetkizdi.
Budan bólek, Taraz qalasyndaǵy Sherhan Murtaza atyndaǵy rýhaniiat jáne tarihtaný ortalyǵy direktorynyń orynbasary Ahmetjan Ózbekov, ádebi aýdarmashy, «Bir kem dúnie» jinaǵyn ózbek tiline aýdarǵan Dalymjan Saifýllaev, Túrkiiadaǵy Gazi ýniversitetiniń professory, ádebiettanýshy-ǵalym Jemile Kynajy jáne túrkolog, Baký memlekettik ýniversitetiniń ǵylymi qyzmetkeri Maleika Mirzali zoom júiesi arqyly jazýshynyń shyǵarmashylyǵy týraly paiymdy pikirlerin, tushymdy oilaryn ortaǵa saldy.
Mazmundy jiynǵa Qazaqstan Jýrnalister odaǵy Túrkistan oblystyq filialynyń tóraǵasy, oblystyq máslihattyń depýtaty Ǵalymjan Elshibai moderatorlyq etti.
Simpoziým aiasynda buǵan deiin «Sherhan Murtazanyń prozasy men pýblitsistikalyq shyǵarmalaryn taldaý» taqyrybynda ótken baiqaýdyń jeńimpazdary marapattalyp, olarǵa qarjylai syilyqtar tabys etildi.
