Táýelsizdik kúni qarsańynda Túrkistan qalasynda belgili kompozitor Shámshi Qaldaiaqovqa eskertkish ornatyldy, dep habarlaidy "Ult aqparat".
Eskertkish «Aqjaiyq» mýzyka mektebiniń aldynda oryn tepti.
Kompozitsiianyń ashylý saltanatyna oblys ákimi Ómirzaq Shókeev, QR Parlamenti Senatynyń depýtaty Álimjan Qurtaev, Halyqaralyq «Alash» ádebi syilyǵynyń laýreaty Kópen Ámirbek, mýzykalyq prodiýser Qaldybek Qurmanaliev, «Sh.Qaldaiaqov» poiyzymen Almatydan arnaiy kelgen qonaqtar, ziialy qaýym ókilderi men jýrnalister qatysty.
«Túrkistan oblysy – qazaq dalasyna qanshama daryndy syilaǵan kieli meken. Ánimen keń dalany terbetip, «qazaq valsiniń koroli» atanǵan, Qazaqstan Respýblikasy Ánuranynyń avtory Shámshi Qaldaiaqovtyń biyl týǵanyna 90 jyl tolyp otyr. Otyrarda týyp, án padishahy atanǵan, qaitalanbas daryn iesiniń esimin ulyqtaý – bizge artylǵan abyroily mindet. Túrkistan qalasynyń jańa ortalyǵynda boi kótergen kompozitordyń eskertkishi – oblys jurtshylyǵyna, qazaq eline mereke qarsańynda tamasha tartý bolyp otyr», - dedi oblys ákimi.
Demeýshiler esebinen qarjylandyrylǵan eskertkish qoladan quiylǵan. Biiktigi – 2,5 metr, uzyndyǵy – 3,5 metr. Avtory – Qazaqstannyń Eńbek sińirgen óner qairatkeri, kásibi sheber músinshi Tileýberdi Binashev.
Kompozitsiiada Qaldaiaqovtyń shyǵarmashylyq oi ústinde otyrǵan sáti beinelengen.
«Sazger beinesiniń jas jetkinshekterdi ónerge, mádenietke baýlityn «Aqjaiyq» mýzyka mektebiniń aýlasynda boi kóterýi – zańdylyq. Halyqtyń sýretke túsýine, jaqynyraq kelip kórýine yńǵaily.
Qazaq rýhaniiatynyń jandanýyna ólsheýsiz úles qosyp, búkil qazaq jerin terbetken Shámshi beinesi jas ónerpazdardy izgilikke baǵyttaityn baǵdary bolary sózsiz. Túrki jurtynyń rýhani astanasy – Túrkistan qalasynda daryndy tulǵalardyń esimi ulyqtalýy – qazaq rýhaniiatyndaǵy ilkimdi istiń biri», - dedi Túrkistan oblysy ákiminiń baspasóz qyzmetinen.
