.jpg)
Sýret: ýniversitet saitynan
Budan bólek Qazaqstan Koreianyń eń myqty zertteýshi ýniversitetimen arnaiy memorandýmǵa qol qoidy. Bul týraly Ǵylym jáne joǵary bilim ministri Saiasat Nurbek Aqorda kýlýarynda aitty, dep habarlaidy "Ult aqparat" inbusiness.kz saityna silteme jasap.
"Ońtústik Koreia Prezidentiniń saparynyń aiasynda bilim jáne ǵylym salasynda óte jaqsy jańalyqtarmen, súiinshimen bóliskim keledi. Keshe Koreianyń ǵylym jáne aqparattyq tehnologiialar ministrimen KAIST – Koreianyń eń myqty zertteýshi ýniversitetimen arnaiy memorandýmǵa qol qoidyq. Endi Koreia úkimetiniń, KAIST ýniversitetiniń kómegimen Qazaqstanda KAIST-Qazaqstan degen myqty halyqaralyq deńgeidegi zertteýshi ýniversitet paida bolady. Koreia tarapy tolyqqandy óziniń ishki baǵdarlamalary men akademiialyq mazmunymen tegin bólisýge daiyn. KAIST-tyń burynǵy prezidenti kelip, bizge kómektesýge daiyn. Bul óte jaqsy jańalyq, nege deseńiz, KAIST 1971 jyly Stenford ýniversitetiniń kómegimen aiaqqa turǵan bolatyn", - dedi ministr tilshilerdiń saýalyna bergen jaýabynda.
Sózinshe, KAIST – Aziiadaǵy eń myqty zertteýshi ýniversitetterdiń biri. Ýniversitet Phd jáne magistratýra baǵdarlamalarymen jumys isteidi.
"Búgin Koreia úkimeti men bizdiń ministrliktiń arasynda arnaiy kelisimshartqa qol qoiylady. Endi bizdiń zertteýshilerimizge Koreianyń eń myqty ýniversitetterinde jáne zerthanalarynda oqýǵa, taǵylymdamadan ótýge, zertteýlermen ainalysýǵa múmkindik beriledi. Bul "Bolashaq" jáne basqa da baǵdarlamalardyń aiasynda júzege asyrylady. Taǵy da eki kelisim shartqa qol qoiylady. Birinshisi – SeoulTech Koreianyń ulttyq ǵylymi-tehnikalyq ýniversiteti Qorqyt ata ýniversiteti negizinde birinshi jasandy intellekt mektebi ashylady. Kiberqaýipsizdik, jasandy intellekt jáne kompiýterlik injeneriia sekildi úsh baǵdarlamamen bastaimyz. Stýdentter káris jáne aǵylshyn tilinde oqidy. Úsh jyl Qazaqstanda, bir jyl Koreiada, eki diplommen shyǵady", - dedi vedomstvo basshysy.
Kelesi jyly Túrkistan qalasynda Woosong jeke menshik ýniversitetiniń filialy ashylady.
"Woosong ýniversitetiniń qazaqstandyq túlekterine Koreiaǵa tikelei baryp jumys isteýge múmkindigi bolady. Jumys vizalary resmi túrde beriledi", - dedi Saiasat Nurbek.
