Túrkistandaǵy Q.A.Iasaýi atyndaǵy Halyqaralyq qazaq-túrik ýniversitetiniń mádeniet ortalyǵynda «Túrkistan shehrengizi» atty shara ótti. «Túrkistan - Túrki áleminiń mádeni astanasy» jyly aiasynda uiymdastyrylǵan sharaǵa túrki halyqtarynyń sáýletshileri bas qosty, dep habarlaidy "Ult aqparat".
Basqosýdy TÚRIKSOI halyqaralyq uiymy, Túrki álemi injenerler men sáýletshiler odaǵy jáne Q.A.Iasaýi atyndaǵy Halyqaralyq qazaq-túrik ýniversiteti birlesip uiymdastyrdy.
«Túrki áleminiń mádeni astanasy» mártebesin alǵan Túrkistan qalasyn qoldaý maqsatynda uiymdastyrylǵan bul sharaǵa Túrkiiadan 40-tan astam delegat qatysyp, qasietti qalanyń bolashaq damýyna bailanysty óz pikirlerin ortaǵa saldy. Sondai-aq, jiynǵa TÚRIKSOI, TúrikPA, Túrki Akademiiasy sekildi túrkitildes halyqtardyń ortaq integratsiialyq halyqaralyq uiymdarynyń ókilderi keldi.
Aita keteiik, «Shehrengiz» sózi ortaǵasyrda túrki musylman jurtynda, otyryqshy halyqtarda qoldanylyp, keiin umyt bolǵan. Qazirgi tilmen aitqanda «Qala kúni» uǵymyna jaqyn maǵyna beretin sóz. Ortaǵasyrlyq musylman elderiniń qalalarynda arnaiy bir kúndi osylai atap, sol kúni qalanyń bolashaq damýyna, sáýlet nysandaryna qatysty májilister ótkizilgen. Jiyn sońy músháiralarǵa, túrli óner saiystaryna ulasatyn bolǵan. Birneshe jyldan beri Túrkiiadaǵy Túrki áleminiń injenerler men sáýletshiler odaǵy osy dástúrdi qaita jandandyrýǵa kúsh salýda. «Qashǵardan Andalýsiiaǵa deiingi túrki musylman qalalary» atty bul mega-joba aiasynda buǵan deiin de álemniń birneshe qalasynda dál osyndai sharalar ótkizilgen bolatyn.
Jiyn barysynda sóz alǵan Túrki álemi injenerler men sáýletshiler odaǵynyń Bas hatshysy Ilias Demirdji túrkiialyq sáýletshiler Túrkistan qalasynyń damýyna qatysty kez-kelgen sáýlet-qurylys jobalarynyń ázirlenýi men qurylys jumystarynyń júrgizilýine qoldan keler kómekterin berýge daiyn ekendikterin jetkizdi.
«Tipti, naqty usynystar bolsa, investorlardy tartýǵa da múddelimiz», - dep atap ótti ol.
