Elimizdegi biiktigi jaǵynan úshinshi alyp Tý Túrkistanda boi kóterdi. «Rámizder alańy» dep atalatyn árbir jannyń rýhyn oiatatyn alleia qasietti qalaǵa Shymkent baǵytynan kire beristegi Q.A.Iasaýi atyndaǵy HQTÝ-diń qarsy aldyna ornalasty, dep habarlaidy Ult.kz tilshisi.
Munda Qazaqstan Respýblikasynyń Memlekettik Rámizderi kórinis tapqan jáne eldik muratty meńzegen qanatty sózder jazylǵan arnaiy tas taqtalar sap túzegen. «Rámizder alańynda» kók aspandy tilip ushqan qyrannyń, jer men kóktiń arasynda qalyqtaǵan tulpardyń, sondai-aq Ánurannyń biik tuǵyry ornaǵan. Kópshiliktiń demalys aimaǵy retinde salynǵan orynda adamdar úshin arnaiy oryndyqtary, sý syldyrymen ásem áýen shyrqalatyn sýburqaq bar.
Buǵan deiin shahar basshysy Á.Óserbaev qala ziialylaryn osy nysannyń qurylysymen tanystyrý barysynda: «Rámizderge degen qurmet Otanǵa degen shynaiy súiispenshiliktiń belgisi bolyp tabylady. Sondyqtan elimizdiń onyń ishinde Túrkistan qalasy turǵyndarynyń patriottyq rýhyn arttyrý, týǵan jerge jáne onyń Rámizderine degen qurmetin, maqtanyshyn oiataiyq degen maqsatpen osy «Rámizder alańy» alleiasyn salyp otyrmyz», - degen bolatyn. Sol «Rámizder alańy» alleiasynyń qurylysy búginde óz máresine taiady.
Táýelsiz memleketimizdiń jarshysy Qazaqstan Respýblikasynyń Týy ilingen tuǵyrdyń biiktigi 62,5 metrdi quraidy. Al Týdyń eni 12 metr bolsa, uzyndyǵy - 24 metr. Mamandardyń aitýynsha biiktigi jaǵynan elimizdegi úshinshi Tý retinde sanalyp otyr. Nysannyń qurylysyna qala biýdjetinen 226,3 mln. teńge qarjy qaralǵan.
Táýelsizdik pen memleket simvolyna ainalǵan rámizder alańynyń kieli shaharda boi tikteýi - rýhani jańǵyrýdyń alǵashqy qadamdary deýge bolady. Jańa nysanda kópshiliktiń demalysy úshin bar jaǵdai jasalǵan.
«Qasietti Túrkistan shaharymyzdyń bas qaqpasynyń kireberisindegi «Rámizder alańy» alleiasynyń ashylýy halyqqa úlken qýanysh syilap otyr. Nege deseńiz buryn bul jerler shańy shyǵyp, bos jatatyn. Qazir jergilikti biliktiń qolǵa alýymen, «Túrkistan - túrki áleminiń mádeni astanasy» jyly aiasynda bul úlken bir igilikti istiń bastaýy boldy»,- deidi qala turǵyny Ábdirahman Qydyrbek.
