Búgin Túrkistanda Ózbekáli Jánibekovti eske alýǵa arnalǵan dóńgelek ústel ótti. Ult rýhyn ulyqtaǵan tulǵanyń 90 jasqa tolýyna orai ótken sharaǵa QR Mádeniet jáne sport ministri A. Raiymqulova, Túrkistan oblysy ákimdiginiń ókilderi, elimizdiń beldi qoǵam, mádeniet jáne ǵylym qairatkerleri qatysty, dep habarlaidy QazAqparat.
Ministr Aqtoty Raiymqulova saltanatty jiyndy ashý sózinde biyl Túrkitildes memleketterdiń yntymaqtastyq keńesiniń beiresmi sammitiniń qorytyndysy boiynsha Túrkistan qalasy – Túrki áleminiń rýhani astanasy dep jariialanǵandyǵyn atap óte kele, elimizde rýhani qazynamyzdy saqtap, urpaqqa jetkizýdi kózdeitin memlekettik deńgeidegi túrli bastamalar turaqty túrde qabyldanyp keletindigin jetkizdi. Sonymen qatar, ministr Ózbekáli Jánibekovtiń XX ǵasyrdyӊ 70-shi jyldary Keńes úkimetiniń dáýirlep turǵan ýaqytynda Qoja Ahmet Iasaýi kesenesiniӊ qaita qalpyna keltirilýine uiytqy bolyp, áýlie kesenesi negizinde «Áziret Sultan» qoryq-mýzeiiniń qurylýyna orasan zor eńbek etkendigine erekshe toqtaldy.
«Osyndai iri tulǵa Qazaqsannyń mádenietine, tarihyna óziniń eńbegin sirip ketken ult azamaty, ult rýhyn ulyqtaǵan Ózbekáli Jánibekovtiń murasy alda da óziniń jalǵasyn tabady dep oilaimyn. Sonymen qatar jastardy tárbieleýde, ózimizdiń egemendigimizdiń ári qarai ulyqtaýyna Jánibekovtiń murasy septigin tigizedi degen senimdemin»,- dedi Aqtoty Raiymqulova.
Ózbekáli Jánibekovty eske alý sharalary dóńgelek ústelmen shektelip qoimai, taqyryptyq kórmeniń ashylýy, professor Qulbek Sársenulynyń «Ulttyń uiytqysy» atty Ó.Jánibekov týraly estelik kitaptyń tusaýkeser rásimi jáne «Turan» etnografiialyq tobynyń kontsertimen jalǵasty.
Aita ketý kerek, ulttyq mádenietimizdiń qaita jańǵyrýyna erekshe úles qosqan qairatkerdi ulyqtaý maqsatynda Mádeniet jáne sport ministrligi 2018 jyldan beri Mádeniet jáne óner salasy uiymdary men qyzmetkerleriniń «Rýhani qazyna» respýblikalyq festivalinde Ózbekáli Jánibekov atyndaǵy arnaiy júldeni taǵaiyndap keledi. Búginde Túrkistan oblysynda Otyrar memlekettik arheologiialyq mýzei-qoryǵyna qarasty Arystanbab kesenesiniń irgesinde Iassaýi ilimin jalǵastyrýshy Qurban Jamanbaiuly men Ózbekáli Jánibekovtiń kesenesi ornalasqan. Bul keseneler Otyrar mýzei-qoryǵynyń aýmaǵynda bolýyna bailanysty A. Raiymqulova Mádeniet komitetine atalmysh mýzei-qoryǵynyń qaramaǵyna alý boiynsha jumystardy júrgizýdi tapsyrdy.
